Eman: Falta basta pa loke ta screening di candidato pa minister

ORANJESTAD -   Falta basta di screening ainda prome cu por keda cla. Asina coformador Mike Eman a bisa na salida dialuna atardi di su reunion di consulta cu gremio, na prensa cu tabata ward’e pafo. Esey ta nifica cu pa diahuebs awor ora cu formadornan reuni cu gobernadora pa 10’or di mainta, tin chens cu no tin claridad ainda ken tur ta keda postula pa bira minister ya cu no tur trabou di screening ta completa. Den cuadro di esaki, Eman tabatin dificultad pa indica un posibel fecha pa huramentacion di e gabinete nobo. Echo ta cu no ta formador ta stipula e fecha di huramentacion sino gobernador di Aruba. Y Eman dado momento conciente di esaki, a mustra tambe cu mester duna espacio y respet na gobernador pa cu esaki. Riba e sugerencia di e fecha di 18 di maart, como algo simbolico, esta dia di Himno & Bandera, tampoco no ta un posibilidad realistico. Pa ley, esaki ta un dia liber, y ademas tin acto protocolario agenda pa e mainta ey. Pues tur ta idea bunita pero no realisabel ni ‘logico’. 

SCREENING

Ora cu Eman a bisa cu falta basta, ta pasobra ta un proceso hopi mas rigoroso cu antes, y cu ta ora cu biaha pasa a duna e lista di candidatonan, e ora numa a cuminsa cu e proceso dia 18 di februari ultimo. Y teniendo cuenta cu e screening pa formador mes a tuma 3 siman, lo tabata hopi improbable cu lo por a keda cla cu e screening pa minister, den un tempo similar. Esey a bira conoci hopi liher pa Eman, despues di e bishita ey, siendo cu algun dia prome, e la sigura cu pa comienso di maart 2025, lo por tabatin un gabinete nobo caba. Nos ta na mitar di maart y no ta mira cu esaki lo logra ainda. 

PROBLEMA?

Riba pregunta cu si tabatin problema cu candidatonan pa pasa screening, Eman a sigura cu e no tabata na altura di algo asina, por lo menos di e informacion cu e tabata ricibi te cu awor di e screening. E la mustra si cu e screening medico a bay bon pa tur, y cu tur a pasa e parti ey sin problema. Pero pa e otro aspectonan no por a duna nada ainda. Y tambe, loke e la confirma ta cu contrario na pensamento cu lo entrega documentonan segun nan keda cla, esaki no ta e caso. Ta entrega e grupo completo, y tanten cu esey no ta cla, no ta entrega nada. 

OPOSICION

Pa loke ta e presion di tempo pa formacion, a nota cu mientras cu e formadornan ta conciente di e urgencia pa forma un gobierno mas liher cu ta posibel, mirando e tardansa y tur loke tin cu haci ainda, ta e propio oposicion ta esun cu mas ta pushando pa esaki sosode. Cada oportunidad cu tin, sigur di parti di e prome minister demisionario mes, ta sali e mensahe di ‘forma pa caba’, siendo cu nan como gobierno cu a pasa den dos formacion tras di otro, sa hopi bon con complica e proceso di screening ta. Y mas ainda cu e ley nobo di screening a bin for di propio seno di MEP, den e caso aki specifico, actual parlamentario Edgard Vrolijk. Pues e presion ta mas di oposicion, cu di e coalicion nobo. Ta di warda diahuebs pa tende kico finalmente ta bira e siguiente paso, y cu si tin nombernan cla pa divulga di ken ta bay tin e proximo carteranan.