Eman: Falta basta pa loke ta screening di candidato pa minister

Posted on 03/11/2025 1:44 pm AST | Updated on 03/11/2025 1:46 pm AST

ORANJESTAD - Falta basta di screening ainda prome cu por keda cla. Asina coformador Mike Eman a bisa na salida dialuna atardi di su reunion di consulta cu gremio, na prensa cu tabata ward’e pafo. Esey ta nifica cu pa diahuebs awor ora cu formadornan reuni cu gobernadora pa 10’or di mainta, tin chens cu no tin claridad ainda ken tur ta keda postula pa bira minister ya cu no tur trabou di screening ta completa. Den cuadro di esaki, Eman tabatin dificultad pa indica un posibel fecha pa huramentacion di e gabinete nobo. Echo ta cu no ta formador ta stipula e fecha di huramentacion sino gobernador di Aruba. Y Eman dado momento conciente di esaki, a mustra tambe cu mester duna espacio y respet na gobernador pa cu esaki. Riba e sugerencia di e fecha di 18 di maart, como algo simbolico, esta dia di Himno & Bandera, tampoco no ta un posibilidad realistico. Pa ley, esaki ta un dia liber, y ademas tin acto protocolario agenda pa e mainta ey. Pues tur ta idea bunita pero no realisabel ni ‘logico’.

SCREENING

Ora cu Eman a bisa cu falta basta, ta pasobra ta un proceso hopi mas rigoroso cu antes, y cu ta ora cu biaha pasa a duna e lista di candidatonan, e ora numa a cuminsa cu e proceso dia 18 di februari ultimo. Y teniendo cuenta cu e screening pa formador mes a tuma 3 siman, lo tabata hopi improbable cu lo por a keda cla cu e screening pa minister, den un tempo similar. Esey a bira conoci hopi liher pa Eman, despues di e bishita ey, siendo cu algun dia prome, e la sigura cu pa comienso di maart 2025, lo por tabatin un gabinete nobo caba. Nos ta na mitar di maart y no ta mira cu esaki lo logra ainda.

PROBLEMA?

Riba pregunta cu si tabatin problema cu candidatonan pa pasa screening, Eman a sigura cu e no tabata na altura di algo asina, por lo menos di e informacion cu e tabata ricibi te cu awor di e screening. E la mustra si cu e screening medico a bay bon pa tur, y cu tur a pasa e parti ey sin problema. Pero pa e otro aspectonan no por a duna nada ainda. Y tambe, loke e la confirma ta cu contrario na pensamento cu lo entrega documentonan segun nan keda cla, esaki no ta e caso. Ta entrega e grupo completo, y tanten cu esey no ta cla, no ta entrega nada.

OPOSICION

Pa loke ta e presion di tempo pa formacion, a nota cu mientras cu e formadornan ta conciente di e urgencia pa forma un gobierno mas liher cu ta posibel, mirando e tardansa y tur loke tin cu haci ainda, ta e propio oposicion ta esun cu mas ta pushando pa esaki sosode. Cada oportunidad cu tin, sigur di parti di e prome minister demisionario mes, ta sali e mensahe di ‘forma pa caba’, siendo cu nan como gobierno cu a pasa den dos formacion tras di otro, sa hopi bon con complica e proceso di screening ta. Y mas ainda cu e ley nobo di screening a bin for di propio seno di MEP, den e caso aki specifico, actual parlamentario Edgard Vrolijk. Pues e presion ta mas di oposicion, cu di e coalicion nobo. Ta di warda diahuebs pa tende kico finalmente ta bira e siguiente paso, y cu si tin nombernan cla pa divulga di ken ta bay tin e proximo carteranan.

Gobernador Boekhoudt a ricibi Consul General a.i. di Merca
ORANJESTAD - Diaranson 19 di maart ultimo, Gobernador di Aruba S.E. Alfonso Boekhoudt a ricibi sr. Ramón A. Negrón, pa un audiencia di introduccion na Cas Ceremonial di Gobernador. Sr. Negrón ta e a.i. Consul-General nobo di Merca pa e region di Reino Caribense.
Mas Politica
Lesa Mas
Wever: Consumidornan lo tin proteccion cu base legal fortifica pronto
ORANJESTAD - Diasabra ultimo, 15 di maart, mundo henter ta conmemora Dia Internacional di Derecho di Consumido. Den cuadro di esaki, riba diabierna, Aruba Fair Trade Authority a organisa un charla na Universidad di Aruba caminda a expande riba e esfuersonan andando, ambos pa proteccion di competencia husto, y muy en especial e desaroyonan riba e tereno di proteccion di consumido.
Mas Politica
Lesa Mas
Presion ta riba formador Eman pa resolve impasse ‘nobo’ pa forma gobierno
ORANJESTAD – Formadornan Mike Eman lo mester ta haciendo intento pa e siman aki ainda, logra keda cla cu e formacion di gobierno, no obstante tur e bruhamento cu tin di ultimo dia pa cu e proceso cu atrobe tabata pega. For di un entrevista haci na e portal 24ora, e formador a duna impresion cu tur cos ta canando bon, y cu e siman aki ainda por keda cla. Sinembargo, e situacion no ta mustra asina, y cu e tin e presion interno pa tuma decision y asina si, logra keda cla e siman aki ainda manera cu Eman mes a bisa.
Mas Politica
Lesa Mas
Politiconan di Bonaire presente na acto protocolario di Dia di Himno y Bandera
ORANJESTAD – Un delegacion di politico di e isla di Bonaire a presencia e ceremonia protocolario relaciona cu dia di Himno y Bandera di Aruba diamars ultimo. Ta trata di miembronan di Eilandsraad Cyril Vrolijk (Fraccion Vrolijk), James Kroon (UPB) y Benito Dirksz (UPB). Tambe tabatin presente, sra Nina den Heyer cu ta diputado pa Asunto Social, Enseñansa y Cultura. No ta inusual cu durante eventonan asina, politiconan di otro parti di Reino Hulandes ta presenta na Aruba, y visa versa. Riba potret cortesia di partido Futuro, por mira e politiconan di Bonaire hunto cu presidente di Parlamento Gerlien Croes y miembro di parlamento Gino Goeloe.
Mas Politica
Lesa Mas
Partidonan dispuesto pa reuni awe riba formacion di gobierno nobo
ORANJESTAD – Por ta cu ya awe dialuna, comunidad ta conoce e nomber di e ministernan nobo di e gabinete nobo cu mester sinta proximamente. No tin nada oficial programa, pero tur partidonan ta habri y dispuesto pa reuni cu otro, aunke cu e oficina di gobernador mes oficialmente ta cera pa dianan di fiesta. Si ta bon, formadornan Mike Eman y Gerlien Croes mester a papia cu e candidatonan pa minister e fin di siman aki, y ricibi e ultimo resultado di screening di e candidatonan diabierna ultimo. Manera cu Noticiacla a bisa diabierna caba, e biaha aki no tin un fecha specifico stipula pa e siguiente encuentro entre formadornan y gobernador di Aruba, SE Alfonso Boekhoudt.
Mas Politica
Lesa Mas
Formacion ta tranca awor pa posicion di minister plenipotenciario
ORANJESTAD – E motibo di problema pa forma un gobierno nobo, ta keda escohencia di persona pa yena funcion. Manera a bira e chiste den pueblo, ta mucho ocupa bringando cua popchi ta haya cua posicion. Si e intencion y boluntad tabatey pa awe dialuna keda cla cu e formacion y acudi na gobernador pa por los e lista di nomber di candidatonan pa minister, esaki tin cu warda algun dia mas. Por lo menos te diaranson of mas sigur diahuebs. Discusion ken ta bira e proximo minister plenipotenciario, ta awor e dolor cabez di e formadornan. Algo cu segun informacion, tabata conoci hopi tempo pero cu awor a bira un asunto primordial.
Mas Politica
Lesa Mas