Ex minister Besaril mester presenta dilanti mesa berde diaranson pa caso Tulipan

ORANJESTAD – Diaranson mainta awor, ex minister plenipotenciario Guilfred Besaril hunto cu e ex director di Aruba Huis mester presenta dilanti mesa berde pa responsabilisa nan mes pa e cargonan cu tin contra nan. Ademas, Besaril mester presenta pa un caso di expropiacion, esta pagamento bek di un suma cuantioso na gobierno di Aruba. Conforme e agenda di corte (rol), caso ta riba rol di corte pa cuminsa 8’or y mei di mainta. A compronde tambe cu e tratamento lo ta mas bien un regie zitting, esta ‘solamente’ atende di forma cu huez por haya un actualisacion di kico falta ainda prome cu e caso mes tuma lugar. Lo puntra p.e. si mester mas informacion, documento, interogacion di testigo etc. Y e ora huez lo mas sigur pone un fecha mas pa wak si tur cos ta cla y despues stipula un fecha pa e caso tuma lugar. Por bien ta cu diaranson mes, dependiendo con e caso ta bay, cu huez por postula un fecha pa e caso bin dilanti. Ta premira cu e caso por tuma lugar net prome of despues di zomer recess ainda e aña aki. 

E CASO

E caso ta uno cu gobierno a denuncia contra e ex mandatario, ora cu investigacion a saca na cla cu e ex mandatario lo a abusa di su funcion di mandatario, usando mas bien fondonan di pueblo, pa uso personal durante su funcion na Hulanda. Unabez cu a ricibi keho, a haci e denuncia despues di cual a inicia un investigacion. Esey a conduci na awor un caso yama Tulipan contra e ex mandatario. 

DETENCION

Relaciona cu e investigacion, e ex mandatario a keda deteni pa e caso riba 13 di februari 2024 pa 24 dia. A prolonga e detencion dos biaha (un biaha 8 dia y despues 16 dia) y riba 8 di maart 2024, Besaril a recobra su libertad, despues di tabata deteni pa 24 dia.  E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes den e periodo 2018-2021.  

MAS EX MANDATARIO DEN PROBLEMA

Esaki no ta e prome ex mandatario di gabinete Wever Croes cu ta haya su mes dilanti mesa berde. Prome cu ne tabatin Otmar Oduber, y Glenbert Croes. Oduber ya caba a haya su dia inicial den corte y Croes ta wardando su caso bin dilanti.