Gobierno no ta apela: Z Air por haya su permitnan pa bula pa St Maarten!

PHILLIPSBURG - Durante un konferensia di prensa semanal di gobièrnu di St. Maarten, Heyliger-Marten a bisa ku seguridat den aviashon ta keda un prioridat pa St. Maarten. SMCCA ta tene su mes na regulashonnan lokal i internashonal pa sòru ku ta kumpli ku e reglanan di seguridat. EZ a kumpli ku e medidanan estrikto aki i St. Maarten ta spera ku tur kompania ku ta bula riba St. Maarten pa sigui kumpli ku regulashonnan i lei di seguridat.

Gobièrnu di St. Maarten ta sigui para pa un sektor di aviashon transparente i bon regulá ku enfoke riba kresementu ekonómiko, seguridat i kompetensia hustu, Heyliger-Marten ta terminá bisando. CAASM tabata eksigí un karta di Z Air firmá pa outoridat di aviashon sivil di Kòrsou i di Merka (FAA) kaminda ta duna garantia ku tin supervishon riba seguridat di e avionnan di Z Air ku ta registrá na Merka. St. Maarten su punto di salida tabata ku no tin klaridat riba kon e supervishon riba e operashon di buelo ta repartí entre Kòrsou i Merka.

Korte a dikta ku minister di St. Maarten no a supstansiá sufisientemente dikon e karta akí ta nesesario pa seguridat di operashon di buelo. E repartishon di responsabilidatnan, segun korte, ta reglá sufisiente den lei i regulashonnan eksistente. Banda di esaki e eksigensia ku mester di un deklarashon por eskrito di FAA segun korte no ta algu ku Z Air tin influensia riba dje.

Pa e motibu akí ta konsiderá e eksigensia di e karta di FAA komo desproporshonal. Tumando tur e esakinan na konsiderashon korte den promé instansia a yega na e konklushon pa destruí e eksigensianan di gobièrnu di St. Maarten i a ordená pa mesora otorgá Z Air e pèrmitnan ku e a pidi for di febrüari 2024. NOTA: Texto ta scirbi den Papiamento fonetico di Corsou.