OM: E pakico e dos polisnan den caso di morto di hoben, no ta deteni

ORANJESTAD - E polisnan envolvi den e caso lamentable recien cu a laga un hoben morto despues di persecucion, a wordo scucha como sospechoso den e investigacion. Asina ministerio Publico a sigura diahuebs atardi. Ademas, a clarifica pakico nan no ta deteni (ainda). “Polisnan cu haci uso di nan arma den tempo di trabou no ta wordo deteni en principio, mientras ta spera riba e resultadonan final di e investigacion hiba pa Landsrecherche, ya cu segun ley, nan por usa e arma di servicio bao cierto condicionnan” e informe ta bisa. “E investigacion mester determina si nan a cumpli cu e condicionnan aki”, cu ta indica cu si resulta cu nan a actua incorecto, ainda nan lo por wordo deteni. “Ey ta mira tambe e diferencia cu civilnan”. Posiblemente e declaracion aki ta splica e motibo cual e polisnan ta liber, y pakico tin asina hopi hende cu tin rabia pa cu esaki, sin sa e motibo di nan libertad actual.