Ingreso genera pa turistanan cu usa HOH, ta bay pa gesto na muchanan di scol

ORANJESTAD - Ingreso genera pa turistanan cu usa hospital Horacio Oduber (HOH), ta bay pa gesto na muchanan di scol na Aruba. E aña aki, Hunta di Directiva di HOH, esta sr. Jacco Vroegop y sr. Gregory Croeze ta honra y gradici pa e oportunidadnan cu a yega Hospital. Danki na e ingreso adicional cu ta wordo genera pa medio di turistanan di afo cu pa un of otro motibo di salud, mester di cuido medico durante nan vacacion na Aruba, HOHtin e oportunidad pa haci un gesto significativo na cinco mucha.

Educacion pa muchanan special ta rekeri mas fondo cu actualmente tin disponibel cu ta pone cu algun mucha ta perde e oportunidad di asisti e scol excepcional aki.  Pues, HOH a scoge pa patrocina educacion di cinco mucha cu ta bishita Brighter Future Foundation. “Di e forma aki, nos ta aporta pa e muchanan aki por ricibi educacion, recurso y oportunidadnan cu nan merece, sigurando cu nan tambe por alcansa nan potencial maximo”.

HOH ta compromete no solamente cu salud y bienestar di nos comunidad, pero tambe den crea un Aruba mas fuerte, educa y yena di potencial. “Nos ta expresa nos gratitud na e bishitantenan cu ta haci e donacion aki posibel pa nos por duna bek y inverti den futuro di nos isla. Hunto, team di HOH y Brighter Future Foundation ta construi un futuro mas saludabel y briyante!”