ORANJESTAD – Tur aña riba 4 di februari, rond mundo nos ta observa Dia Mundial di Cancer, un dia dedica na conscientisa y informa comunidad riba prevencion, detecion tempran, y tratamento di cancer. Pa e ocacion aki Departamento di Salud Publico di Aruba (DVG) lo ta enfatisando riba un punto crucial: E impacto dañino cu consumo di alcohol tin y su fuerte relacion cu cancer!
Alcohol ta un factor importante cu ta contribui na desaroyo di varios tipo di cancer. E Organisacion Mundial di Salud (WHO) na 2019 a reporta cu 4.4% di e total di diagnostico di cancer y tambe 401,000 morto debi na cancer tawata tin un relacion directo cu consumo di alcohol. Alcohol y cancer tin un coneccion serio. Alcohol por causa cancer den diferente parte di bo curpa incluyendo; boca, garganta, larynx, higra, pecho, tripa y rectum. No tin un nivel sigur di consumo di alcohol pa evita cancer. Cada bebida ta conta y e riesgo ta cuminsa desde e prome bebida y ta aumenta segun ta bebe mas. Pa personanan cu ta bebe alcohol excesivamente e riesgo ta hasta 30 bes mas halto y si ta huma, e riesgo ta subi drasticamente mas ainda.
Estadistica di Cancer na Aruba
Entre 2011 y 2021 DVG a reporta cu e tipo di cancer cu mas ta causa mortalidad na Aruba ta:
• Cancer di pulmon
• Cancer di luchtpijp (trachea)
• Cancer di pecho
• Cancer di tripa y rectum
Un total 740 persona a fayece na Aruba durante e periodo di 2011 pa 2021 pa motibo di cancer.
Segun investigacionnan global, entre 30% y 50% di morto di cancer por wordo preveni si nos evita ciertos factornan di riesgo manera entre otro consumo di alcohol. Deteccion tempran y tratamiento adecuado tambe ta reduci e impacto di cancer.
Pa reduci e posibilidad di desaroya cancer, DVG ta recomenda:
• No huma of vape
• Mantene un peso saludable
• Come saludable, incluyendo fruta y berdura
• Haci ehercicio regularmente
• Limita consumo di alcohol na consumo poco frecuente
• Usa proteccion durante relacion sexual
• Vacuna contra hepatitis B y HPV
• Uza sun block regularmente pa evita exposicion na rayonan di solo
ORANJESTAD – Un dia despues di a bishita Aruba, e barco crucero Rotterdam di Holland America Line, a raporta un brote di malesa gastrointestinal riba su nabegacion actual cu mas cu 100 pasahero malu abordo. Di acuerdo cu e Centronan pa Control y Prevencion di Malesa (CDC), Rotterdam di Holland America Line tin 107 invitado malo abordo di su biahe actual cu a sali dia 2 di februari 2025. Segun informe, 12 miembro di tripulacion tambe ta malo.
BOGOTA – Un grupo di ciudadano Colombiano a keda deteni pa agentenan di imigracion.Esaki segun e portal pluralidadz.com. Segun e relato, no ta specifica mucho si di ki tempo esaki a sosode ni cu cuanto hende. Solamente cu un grupo di agente di biahe Colombiano a raporta di ta victima di trato inhusto y arbitrario di autoridadnan di inmigracion di Aruba. Loke ta hala atencion, ta cu e accion aki a logra hala atencion di medionan Colombiano, poniendo un tinte negativo riba nos servicio di imigracion.
ORANJESTAD - Diaranson 13 di Februari 2025, Wikipedia riba Aruba lo lansa oficialmente cu un evento di apertura na Biblioteca Nacional Aruba. E proyecto aki, cu ta dura 18 luna, tin como meta pa educa e comunidad local riba e poder di Wikipedia, forma un comunidad activo pa comparti conocemento, y mustra e herencia rico di Aruba riba un plataforma global.