Corte a declara docente di deporte liber di acusacion di pedofiel

ORANJESTAD – Awe mainta den Corte tabatin consternacion pa un sentencia di huez den un caso di acusacion di un docente di deporte di pedofiel. Corte diabierna mainta a declara un homber sospecha di pedofilia y abuso di mucha, liber di tur acusacion, pues a absolv’e completamente. Esaki pa falta di prueba. 

E CASO

Segun e acusacion, e homber E. , un docente di deporte na un scol na Savaneta, entre 2014 y 2017 lo a tene actonan inmoral cu un mucha e tempo ey e menos di edad. Pero ta te 2024 e mucha a ‘basha abou’ na Hulanda. E mama e ora a entrega keho contra e persona E.

DECLARACION NO TA CUADRA Y FALTA PRUEBA

 Pero durante tratamento di e caso, a resulta segun huez, cu e declaracionan di e victima, no ta cuadra aunke cu e ta amplio. Pero pa amplio cu e tabata, e no ta ‘exacto’. Ademas, si ta un testigo so tin, mester tin ‘prueba di sosten’, locual no tabatin den e caso aki. Ademas no tabatin prueba di pornografia, no obstante e potretnan cu a haya den e ipad di e docente, ya cu no por cualifica e potretnan ey como pornografia. 

ABSOLUCION COMPLETO

Como tal, a declara e homber completamente liber di tur acusacion pa cual e por a recobra su libertad mesora. Ademas e demanda pa daño y perhuicio tambe ta keda rechasa. E famia di e victima, na final di e sentencia, no a aprecia esaki niun tiki y tabata basta indigna cu e sentencia.