ORANJESTAD– Comunidad di Aruba ta cordialmente invita na participa den un anochi di arte y filantropia den cual La Cabana Aportando, e fundacion benefico di La Cabana Beach, Resort & Casino, ta organisa un benta di arte pa recauda fondo pa Casa Cuna Progreso y Kinderhuis Imeldahof.
E evento ta tuma luga diabierna 31 di januari 2025 den e area di Mezzanina di e Lobby di La Cabana (2do piso) y lo conta cu un coleccion exkisito di obranan di arte de varios artista local renombra, incluyendo Elvis Tromp, Brian Lucier y Natasha Lopez, entre otro.
Lo tin oportunidad pa mira cada piesa di cerca, scoge bo faborito y ora e bin dilanti, hisa bo man pa bo duna bo oferta. E miho oferta di publico ta bay cu ne, hunto cu e satisfaccion di yuda Casa Cuna y Imeldahof pa sigui brinda cuido y proteccion na e muchanan cu mester.
E anochi ta mas cu un benta di arte; e ta un celebracion di e talento local y di e trabou importante cu Casa Cuna y Imeldahof ta realisa den nos comunidad. Cada pieza bendi ta contribui directamente na mehora e cuido, educacion y futuro di e muchanan cu ta habita na e instancianan aki.
La Cabana Aportando ta invita empresa y organisacionnan local pa eherce nan responsabilidad social corporativo door di participa cu un representante na e evento importante aki pa realisa un contribucion. Bo apoyo no djis ta contribui na arte local, pero tambe lo tin un impacto duradero den e bienestar di e muchanan den necesidad.
Uni na un anochi inolvidabel, yen di inspiracion artistico, conexion comunitario y generosidad sincero. E cita ta diabierna 31 di januari 2025 pa 7’or di anochi ariba den lobby di La Cabana. Ban uni pa celebra creatividad y generosidad, sigurando un futuro mas briyante pa muchanan di Aruba. Pa mas informacion of pa confirma bo participacion, contact 5932880 of 5926931.
ORANJESTAD - E luna di februari a cuminsa cu un celebracion mas, esta di colega Claudia Arevalo-del Castillo, kende a cumpli 5 aña den servicio cu Botica di Servicio.
SAN NICOLAS – E conocido cantante Malaghy Richardson, conoci como ‘Freddy Rasta’, a bira e Socca Winner di 2025, cu su cancion 1 for Unity, cu e banda Tsunami. Pabien na Freddy Rasta. Na di dos lugar a keda Queen Shine, di tres lugar Galloway, di cuater finalista T-Money y finalmente Blacky cu Groove Masters.
SAN NICOLAS - Durante e ultimo dianan aki Stichting Musica a publica varios video y potret riba nan Facebook page, cu ta duna un bista di e preparacion grandi cu tin tras di Aruba Caiso Soca Monarch 2025. Varios artista a wordo entrevista y ta cla pa duna un tremendo presentacion pa nan fanaticada. Diasabra awor, 8 di februari 2025, un total di 30 artista lo participa den e Soca Finals 2025, acompaña pa 14 banda.
PALM BEACH – Un grupo selecta di prensa e siman aki a experencia e Sunset Grille ‘transforma’ na Hilton Aruba Caribbean Resort & Casino. E restaurant local hopi conoci, a habri su portanan recientemente atrobe despues di un periodo di renobacion extensivo. Y tabata den cuadro di esaki cu e grupo di prensa aki tabata invita. E restaurant su imagen nobo ta un combinacion di elementonan clasico cu un toke moderno. E ta ofrece un ambiente distincto, brindando momentonan inolvidabel pa nos localnan y bishitantenan.
ORANJESTAD – Recientemente gerencia di Joia Aruba by Iberostar a celebra nan apertura oficial di e rooftop bar ZIMA, situa banda di un pisina infinito espectacular cu ta parse di uni cu e horizonte di Caribe. ZIMA ta mustra di ta e lugar perfecto pa relaha, disfruta di un experencia unico di tapas y deleita den e miho bista di e isla.
MIAMI - E artista di Aruba , nomina pa Grammy, Jeon, ta bin bek cu un poderoso colaboracion cu e exito, “Ven Ven”, hunto cu Farruko, Fariana y Alex Sensation. Originalmente graba como un tema solista ‘Savaneta’ pa Jeon y produci p’e reconocido Steve Andreas, e cancion rapidamente a capta e atencion di e figuranan grandi di musica global, acumulando miyones di views y downloads.