Danesnan preparando militarmente en caso Trump dicidi di tuma Groenlandia

DINAMARCA - Gobierno di Dinamarca lo gasta 14.6 biyon kroner (casi 2 biyon euro) den e proximo añanan pa fortalece su presencia militar na Groenlandia, asina minister di Defensa Lund Poulsen a anuncia. E placa lo wordo usa pa construi tres barco di guera adicional pa proteha e isla semi-autonomo cerca di Polo Norte, cu ta forma parti di e reino Danes pa e ultimo 200 añanan. Placa adicional tambe ta wordo inverti den vigilancia via drone y satelite.

Groenlandia ta mas o menos cuater biaha mas grandi cu Francia, y actualmente ta wordo patruya pa, entre otro cosnan, cuater barco di patruya anticua, un avion y un dozijn di team di patruya riba slei di cacho.

TRUMP TA RECLAMA PA TUMA GROENLANDIA

E isla ta den spotlight pasobra e presidente nobo di Merca Trump a exigi pa gobierno Danes entrega e control di e area na e Mericanonan hasta prome cu su inauguracion na comienso di e luna aki. E danesnan ta nenga esei.

Fin di siman pasa, Financial Times a informa cu Trump a menasa di impone invoerrechten riba e Danesnan den un combersacion telefonico “agresivo” cu prome minister Danes Frederiksen si nan no cede. Trump su yiu Donald Jr. a bishita e isla mas trempan e luna aki, aunke e mes a bisa cu e tabata eynan como turista.