Aruba tambe afecta pa suspension di ayudo financiero di Merca

ORANJESTAD – E paro di ayudo financiero mundial cu Merca a para recientemente riba orden di e presidente Donald Trump, ta afecta Aruba tambe. Un di e organisacionan cu ta ricibi placa anualmente di Merca ta Pan American Development Foundation (PADF), cu tin su oficina na Aruba y Corsou. E director Raynel Martis basa na Corsou, cu ta maneha e oficina di Aruba tambe, den un declaracion na e matutino Antiliaans Dagblad a confirma den un mensahe breve cu nan tambe ta afecta pa e decision pa suspende tur ayudo financiero pa 90 dia. E suma cu e organisacion aki ta aporta cu ne, ta 200 mil dollar pa aña y ta reparti esaki entre varios organisacion. Mas e director no por a bisa, debi cu e ta algo delicado y no ta considere ‘etico’ pa duna mas informacion riba un tema cu ta hopi fluido ainda. Echo ta si cu Aruba y Corsou tambe ta afecta pa e decision di gobierno Mericano. Gobierno Mericano kier tempo pa por investiga tur e instancianan cu ta hayando placa, si e ta funciona, y si e ta cuadra cu e politica di e presidente nobo. Pa por a haci esaki, a para tur ayudo, cu excepcion na Israel pa cu e situacion eynan.