Jurickson Profar di Corsou ta firma ku Atlanta Braves

ATLANTA - Despues di algun luna di basta spekulashon, ayera Jurickson Profar a haña un ekipo nobo. Esaki ora el a yega na un akuerdo ku Atlanta Braves pa tres temporada i $42 mion. Profar lo risibí $12 mion den e promé aña i $15 mion e último dos añanan di e kontrakt.

Jurickson Profar despues di su mihó temporada den Liga Grandi, asina ta sigurá e kontrakt di mas grandi ku el a haña den su karera.

Temporada pasá Profar a bati pa un promedio di 280 ku 24 honron i 85 kareda empuhá. Banda di esaki el a bati 29 doblete, el a anotá tambe 94 kareda i tabatin un porsentahe di yega base di 380.

E yu di Kòrsou a logra pone rèkert personal den tantu kareda anotá, honron, porsentahe di yega base i kareda empuhá den 2024.El a yuda karga tambe e ofensiva di Padres aña pasá, ora vários hungadó importante tabata sea leshoná òf no tabata produsí. Miéntras pa promé biaha den su karera el a bai All-Star Game.

Braves su outfield titular lo tin awor Jurickson Profar, Micheal Harris II i tambe Ronald Acuña Jr ora e regresá for di leshon.

Jurickson lo yuda awor su ekipo nobo ku su bate den leftfield, mirando ku temporada pasá hungadónan ku a hunga e posishon pa Braves no a produsí.

Den 2025 Atlanta Braves lo tin dos yu di Kòrsou den nan filanan. Esaki lo Jurickson Profar i tambe e gran segunda base Ozhaino Albies.

Miéntras ku e akuerdo di Braves ku Jurickson Profar, ta nifiká ku e lo bira e di shete yu di Kòrsou ku lo hunga den Liga Grandi pa e organisashon di Atlanta Braves. NOTA: Texto ta scirbi den Papiamento fonetico di Corsou.