ORANJESTAD - Ministerio Publico a exigi diabierna ultimo den caso contra e sospechoso J.E.P.T. un castigo di prison incondicional di cuatro aña. Ademas fiscal a exigi pa huez kita e derecho di P.T. pa stuur auto pa un periodo di cinco aña largo.
P.T. ta wordo acusa di a causa un accidente grave di trafico riba 24 di mei 2024 na Calbas y cu tabata pa su culpa cu un motociclista a bin na fayece.
Segun Ministerio Publico no tin niun duda cu loke a causa e accidente di trafico tabata cu P.T. no a duna voorrang y a bay core riba otro banda di caminda, dor di cual el a boks frontalmente riba motocicleta di e victima. Ministerio Publico ta considera comproba cu e sospechoso a participa den trafico na un manera hopi imprudente, ademas cu e tabata bao influencia di alcohol y tabata core sin rijbewijs.
Apenas un aña prome Ministerio Publico a kita e rijbewijs aki for di dje, despues cu el a haya un castigo pa core bao influencia di alcohol. Na 2022 el a causa, riba e mes caminda aki, un otro dalmento frontal mientras cu e tabata stuur bao influencia.
Riba 7 di februari venidero Corte lo dicta sentencia den e caso.
ORANJESTAD – Ministerio Publico dialuna a anuncia cu nan a apela e sentencia contra Ex minister Otmar Oduber y E. Esser. Tabata den e sentencia di dia 22 di januari ultimo cu Corte a sentencia Oduber na 365 dia di prizon pa su actonan pa cual e tabata acusa den e caso Flamingo, esta fraude y abuso di su poder como minister, y a absolve Esser di tur tres di su cargonan. Ministerio Publico a bisa di no ta di acuerdo cu e partidi absolucion duna ni e sentencianan di Oduber. A sigura tambe cu OM (Ministerio Publico) ta actua independientemente di politica.
ORANJESTAD – Awe mainta den Corte tabatin consternacion pa un sentencia di huez den un caso di acusacion di un docente di deporte di pedofiel. Corte diabierna mainta a declara un homber sospecha di pedofilia y abuso di mucha, liber di tur acusacion, pues a absolv’e completamente. Esaki pa falta di prueba.
ORANJESTAD - Den su veredicto di 28 di november 2024, Corte di Apelacion a husga cu Colegio di Apelacion (College van Beroep – CvB) di Aruba den casonan di seguridad social no ta un corte independiente y imparcial segun e definicion di articulo 6 di e Tratado pa Proteccion di Derechonan Humano y Libertadnan Fundamental (EVRM). P'esey, desde awor, Corte di Apelacion ta considera su mes autorisa pa tuma nota di apelacionnan contra veredictonan di CvB.
ORANJESTAD – Den Corte di apelacion recientemente, gobierno (lesa: minister di husticia) a gana e caso di permiso di molester (hindervergunning), unda cu como sentencia, Corte di apelacion a revoca e decision di dia 6 di December 2023 unda cu corte e tempo ey a cita cu e grupo di ciudadano na Parkietenbos cu a bringa e otorgamento di e permit di molester. Na su lugar, Corte mes a otorga un permiso di molester pa un periodo di 6 luna, mara na e condicionan asosia cu e rapport STAB. E sentencia tabata dia 15 di januari ultimo pero awe a keda publica. Por lesa e sentencia AKI.
ORANJESTAD – Corte di husticia dialuna a notifica sr Otmar Oduber, sentencia recientemente den e caso penal Flamingo, cu mester a ‘restaura (coregi) un veredicto anteriormente duna, debi cu tabatin ‘un eror obvio den e dictum y den (parti di) e declaracion di e sentencia anterior’. Por corda cu huez den su veredicto, a prohibi Oduber su derecho pasivo di voto, y pa wordo eligi pa un periodo di tres aña den un funcion gubernamental. Segun e coreccion, Corte a bisa ayera cu e pasashi menciona “y di e derecho pasivo di vota” lo wordo elimina, y e hecho cu ta priva e sospechoso di e derecho di ta miembro di e general instancianan representativo pa wordo eligi pa un periodo di 3 (tres) aña” lo caduca.
ORANJESTAD – Denuncianan haci na OM door di entre otro ex minister Marisol Tromp cu tabata e.o. e motibo pa persigui ex minister Otmar Oduber, tabata valido. “Nan no tabata denuncianan falso” e huez cu a presidi e proceso diaranson di sentencia a bisa prome cu e la sentencia e ex mandatario. Ademas a sigura cu no tabatin metemento politico den Ministerio Publico. Ademas, e hecho cu e motibo di kehonan a cambia na caminda, no ta cambia e seriedad di e caso segun e huez. Esaki ta importante pasobra gran parti di e defensa tabata basa riba e mencionan ariba, cu e.o. e denuncia tabata falso, y pesey no tabatin caso contra Oduber.