Oduber: Entrante 1 februari 2025, AZV ta cubri remedi pa tur pensionado di Aruba

ORANJESTAD –  Minister Dangui Oduber a anuncia diamars cu entrante 1 Februari 2025, tur remedi pa pensionadonan lo ta cubri completo bou di AZV. 

Segun e mandatario, 25 di Juni 2024 un mocion a wordo pasa, despues cu 20 parlamentario a vota na favor, pa asina cubri e gastonan di tur remedi pa nos grandinan bek. Advies a wordo pidi na AZV pa si esaki ta posibel y sostenibel. Tambe professor Van Rijn a duna conseho ariba e status demicionario di e gobierno actual. 

Minister Dangui Oduber ta enfatisa cu e decision aki a tuma luga awo, despues cu a ricibi presentacion di e resultado financiero di 2024 y e proyeccion pa 2025. E cifranan tawata di suma importancia, paso e decision aki ta un compromiso structural. Ora cu cuminsa cu e cobertura, e pago mensual pa remedi di nos pensionadonan ta bira un gasto continuo.

Si nos tur ta corda, na 2022 Hulanda a impone un cortamento drastico di 60 miyon florin den e presupuesto di AZV. Esaki a haci cu mester a corta den dunamento di remedi, paso e remarca a drenta cu ta na Aruba so ta ofrece cobertura tan amplio pa remedi. Apesar di reto aki, awe e decision di kita pago di remedi pa nos pensionadonan ta bira realidad, cual ta un beneficio vital pa nos grandinan.