Trabou di revitalisacion di parkinglot Lagoen a conclui y keda entrega

ORANJESTAD – Recientemente e trabounan di construccion relaciona cu e revitalisacion di e parking lot na Lagoen a ser oficialmente entrega. Minister demisionario Geoffrey Wever tabata presente pa mira e resultado di e trabounan ehecuta.

E parking lot cu un diseño modernisa ta amplia e espacio pa parkeo pa un total di 22 auto y 5 luga dedica pa taxi. Ademas, pronto lo tin charging stations pa autonan electrico. E adaptacionnan aki ta reforsa e factibilidad comercial di e area y ta crea mas facilidad pa bishitantenan y comerciante.

Segun e mandatario, cu mas facilidad y accesibilidad,  a invita pueblo y bishitante pa haci uzo di e area. “ Sostene e restaurantnan y negoshinan den e cercania cu nan oferta culinario unico y excepcional, y disfruta di un experiencia Arubano autentico”, e mandatario a bisa.