Na Corsou, specialistanan ta bandonando hospital CMC debi na asunto di LNT

WILLEMSTAD  – Curaçao Medical Center (CMC) den un karta ku karakter di urgensia i alarmante nan ta ilustrá e situashon prekario ku tin aktualmente na CMC. Nan ta bati bèl pa motibu ku henter e operashon di hospital por kai den otro. Den un karta ku ta konta ku 5 paginá ampliamente motivá, CMC ta splika Minister Silvania e seriedat di e realidat di CMC i defakto ku no tin tempu pa pèrdè mas.

Dia 6 di novèmber último CMC a manda un karta pa Minister pa haña aklarashon riba e medida di “Landsverordening Normering Topinkomens” (LNT) pa spesialistanan. E echo ku te ku ayera CMC no a haña reakshon di parti di Minister Silvania, tabata nesesario pa bolbe manda un karta ku karakter di urgensia.

Di akuerdo ku e dokumento di desishon, pa asina desaroyá un sistema di enumerashon pa prestashon refiriendo na un karta fechá 29 di aprel 2024 di Minister, ku ta trata di un karta pa klarifiká un kantidat di punto relashoná ku e dokumento di desishon i e oumento anunsiá den un dokumento básiko relashoná ku LNT.

Manera menshoná e karta ta ilustrá un situashon preokupante den kua CMC ta aden aktualmente. E situashon aktual ta un menasa direkto pa kontinuidat i siguridat di kuido ku mester keda  duná. Den e diferente spesialidat, ta surgiendo riesgonan, ku ta direktamente vinkulá ku e problemanan rondó LNT.

E hunta di direktiva di CMC a aserká Inspektor General di Salú Públiko pa e situashon di urgensia i menasante ku ta eksistí, ku a primintí di diskutí esaki pronto, miéntras  e situashon di CMC ta birando mas i mas prekario. E karta ta ilustrá menasanan agudo eksistente.

T’asina ku na fin di novèmber 2024, CMC a tene un reunion ku SVB kaminda e 2 dòkternan di stoma, tripa i igra (MDL) a bati alarma un biaha mas, pasobra e departamento no tin personal, miéntras esfuersonan pa yega na spesialistanan nobo te awor a keda ébano.

Pa loke ku tin riba mesa pa ofresé un spesialista no ta kompetitivo. Esaki ta hasi kasi imposibel pa atraé spesialista médiko.

CMC a trese algun ehèmpel konkreto dilanti.

Pa loke ta trata spesialistanan MDL 6 di e kandidatonan spesialisá (1 di Sürnam, 3 di Venezuela, 1 di Perú i 1 di Spaña) a renunsiá di nan trabou na CMC pa motibu di e areglo di LNT.

Un spesialista kolombiano ku tei aktualmente ainda, no ta sigur si lo sigui traha. Si e spesialista aki tambe retirá, e ora ei su pareha spesialista tampoko lo bin Kòrsou. Pues CMC ta bolbe na e punto sero.

Sinembargo, CMC ta sigui buska spesialistanan MDL, via e institutonan prinsipal di Colombia i tambe via di kontaktonan di SVB, pero e proseso ei ta sumamente difísil.

Afortunadamente, un spesialista ku ya a yega edat di baha ku penshun a disidí resientemente ku e lo sigui pa un aña mas.

Tin kòmbersashonnan tumando lugá ku Hospital Atventista pa un di nan dòkternan di MDL yuda CMC. Tin tur indikashon ku esaki lo ta un solushon temporal.

Lamentablemente tin dos otro spesialista di MDL aki na Kòrsou ku ta traha riba nan mes, tampoko ta disponibel pa traha bou di e kondishonnan di LNT.

E problema aki ta ripití den “Keel-Neus-Oor” (KNO), ürólogo i no papia mes di spesialistanan di wowo. Listanan di espera ta asina largu ku si un pashènt pidi un sita awor aki, te aki 6.5 luna e lo por yega na turno. E situashon aki ta realmente alarmante mi ta persistí den tur e departamento di CMC.

CMC ta di opinion ku e solushon por ta simpel.

E spesialista médiko empleá pa CMC mester keda pafó di e aplikashon di LNT, òf e standart di pago máksimo mester keda oumentá na 501.000 florin. Den e kaso aki tin un sierto urgensia rekerí esta kuminsá kita den un forma gradual for di e norma máksimo aktual segun LNT (Nafl. 386.000) i kuminsá dia 1 di yanüari 2025, pa yega na e norma nobo. NOTA: Texto scirbi den Papiamento fonetico di Corsou.