Faltando ainda un urna, AVP tin eleccion parlamentario 2024 gana

ORANJESTAD – Faltando un urna electoral, pa 3’or y 44 minuut di diasabra marduga, partido AVP ta mustra di a logra ‘bolter cos’ realmente, manera cu tabata nan lema e campaña electoral aki, ganando e eleccion parlamentario diasabra marduga cu un cantidad minimal di voto, pero suficiente pa dune e un asiento mas, esta 9 asiento (6 cu 3 restzetel) cu MEP tambe cu 8 asiento (6 cu 2 restzetel). E resultado aki sinembargo tabata ainda faltando un urna electoral  Tabata un anochi largo cu a cuminsa cu e prome resultadonan drentando entrante 9’or di anochi. Rapidamente a bira conoci cu e sorpresa di campaña enberdad tabata partido FUTURO, cu (faltando ainda un urnd) ta mustra di a logra no mensos cu 3 asiento (2 plus 1 restzetel) den su prome salida, y partido PPA cu den apenas 2 luna di a ‘renace’ na man di conocido politico Otmar Oduber, a logra saca 1 asiento limpi. AVP tabatin 17658 voto, MEP 17332 voto, y FUTURO 7240 voto. Tur tres, faltando un urna. 

CAREDA ENTRE E TRADICIONALNAN

E careda berdadero tabata entre partido MEP y AVP henter anochi, unda cu cada resultado di cada urna, tabata bolter e resultado entre nan dos. E la sigui asina literalmente te na final, unda cu 3 ultimo urna a wanta e careda aki te den oranan laat di marduga. Pero finalmente e resultado final a drenta, confirmando AVP como e ganador. 

PARTIDONAN CHIKITO

Loke tambe tabata un ‘sorpresa’ ta e resultado decepcionante pa e 7 partidonan chikito MAS, RAIZ, HTC, CURPA, LPR, RED Y ACCION21. Sigur e cuaternan cu ta forma parti di e parlamento actual, esta MAS, RAIZ, ACCION21 Y Ryçond Santos do Nascimento (LPR) cu no ta bolbe den e proximo parlamento. Partidonan MAS y ACCION21 sigur a haya e baño di awa frieu, si tene cuenta cu e resultado di eleccion anterior, y unda cu e dos partidonan aki tabata practicamente sigur di a bolbe y te hasta drenta gobernacion siguiente. 

RETIRA

Por lo menos dos partido chikito a acepta nan derota y a gradici nan siguidornan algun rato despues. Mientras cu lider di HTC Gilbert Webb a simplemente gradici su votadornan, pero no a duna indicacion di retira di politica. Partido CURPA su lider Eric Ras si a anuncia su retiro di politica y di partido den un mensahe riba su pagina di Facebook. 

Noticia den proceso.