Varios medio local a haya advertencia pa viola ley relaciona cu programanan politico durante campaña electoral

ORANJESTAD – Varios medio local na Aruba a viola e ley di telecomuncacion referente transmission di programanan politico e aña aki. Mientras cu e no kier a specifica e medionan, e instancia responsabel pa controla esaki, DTZ, a confirma si cu varios  medio cu a viola e reglanan, a haya un carta di advertencia pa e violacion. Ley sinembargo no ta duna mas caminda pa cana, manera p.e. un multa pa e violacion. 

POLITICONAN TAMBE A PROTESTA

No ta medionan di comunicacion so a critica e ley, sino e propio politiconan cu tin e derecho pa cambia e ley, tambe tabatin critica durante e campaña paso e ley ta ‘limita’ nan na 30 minuut so di programa. A mustra cu proximo parlamentarionan of minister kizas tin cu actualisa e leynan di telecomunicacion y pone esaki como un prioridad, pa evita e tipo di kehonan aki pa e proximo campaña. 

TEMA DI CADA ELECCION

Mester bisa mes momento cu esaki ta un tema di cada eleccion ora cu e medionan di comunicacion (y politiconan) ta critica e ley cu tin, sigur desde entrada di rednan social (social media) unda cu aki no tin ley (ainda) pa regula e grupo aki. Como tal , medionan ‘tradicional’, semper a critica cu mientras cu ta midi nan pa e cantidad di programa y minuutnan cu nan por pasa programa y propaganda politico, esnan cu ta opera riba rednan social, por haci esaki ilimita, y gana placa riba dje, cu ta haci e competencia ‘inhusto’. Y e biaha aki, e medionan cu ta opera exclusivamente riba rednan social, osea internet, a aumenta drasticamente, haciendo e cometencia mas inhusto ainda.