Huez ta dicta sentencia caso Flamingo na januari di 2025

ORANJESTAD  - “Some are equal but some are more equal than others”, ta e forma con Ministerio Publico dialuna mainta a cuminsa nan argumento (repliek) riba e defensa di e sospechosonan den e caso Flamingo. E fiscal en cuestion a sigui insisti cu no mester considera e acto di OM como persecusion pasobra no tabatin presion politico y ‘e loke ta haciendo, no ta politicamente motiva’. Ademas a sigui insisti cu no obstante e defensa, OM ta para ariba cu tabatin trato preferencial. Ademas, cu no tabatin un maneho publica di e excepcionan pa e asina yama young profesionals. Aki tabata sigui faborece cierto personanan. 

CORECCION OF NO

Ademas cu Oduber ta sigui insisti cu e no tabata mete y cu a ‘simplemente’ coregi un fayo haci riba un tereno (na Malmok). E coreccion, no ta un coreccion den wowo di OM, y como tal Oduber debitamente tabata mete den e asuntonan aki,y cu a mete varios biaha y a haci esaki pafo di e persona encarga WC. Ademas, e proceso ta haci cu Ministerraad no por controla documentonan di e asina yama ambtenaar spirito. Ademas e emailnan cu a usa como defensa, segun OM no tabata mustra convincente. Y finalmente, un declaracion comprometedor di e ambtenaar spirito Phillips, ta un declaracion valido y por wordo usa. 

DEFENSA SU REACCION

Pa parti di e defensa, na nan turno (mescos cu OM a haci di nan banda) a purba desbarata e ponencianan di OM, y a bisa cu nan tin confiansa cu e huez lo sa di usa e informacion presenta di un forma corecto. E abogadonan a insisti cu nan ta keda riba nan punto y cu e informacion y fuente presenta contra nan cliente ta inconfiabel, y cu ta evidente cu tur cos ta basa riba un denuncia falso, igual e contenido di e denuncia. 

TERENO

A mustra cu e testigonan di nan a confrma cu e maneho pa cu e young profesionals pa haya tereno, ta cuadra. Ademas a bolbe enfoca riba e liña cortico cu tin entre comunidad y e minister y con cos ta funciona na Aruba, y con facil ta pa tin contacto cu e mandatario, compara cu na p.e. Hulanda y cu esaki no ta nada malo of ilegal

A HASTA YUDA PG

A mustra tambe riba e punto cu e PG di e tempo ey van Dam, a te hasta haci un peticion personal na Oduber e tempo ey pa agilisa e proceso di haya asfalt pa e caya unda cu e edificio nobo di OM tabata situa den Rumbastraat. Y cu Oduber a actua riba esaki poniendo cu e PG a haya asfalta mas lihe. Y tambe despues e PG mes a gradici Oduber pa esaki. Y con mester a cataloga esaki? A trata e parti di spirito tambe na trabou, y mustra cu e fayo di OM ta cu no a haci e investigacion suficiente pa por prueba cu e trahadonan enberdad no a traha. Basa riba e hecho cu no tin base huridico pa demanda e sospechoso, ta haya cu mester declara e cliente liber. Huez a suspende e caso y ta dicta sentencia dia 22 di januari 2025.