- Netflix ta trahando riba documental tocante desaparicion di Natalee Holloway
- Hospital a los nan videoclip di fin di aña cu Jeon y Coro Tutti Frutti ‘Salud na bo salud!”
- Na Hulanda, partidonan D66, VVD y CDA tin te 30 di januari 2026 pa sigui cu e ronda nobo di formacion
- ATA y APA a yama barco crucero MS Renaissance bonbini durante su bishita inaugural na Aruba
- Yiu di Machado ta ricibi Premio Nobel di Paz na nomber di su mama
Na Corsou, PAR, MAN i PNP ta pidi reunion urgente riba situashon político actual
WILLEMSTAD - Frakshonnan den parlamento a pidi un reunion públiko urgente riba situashon polítiko den pais. Apesar ku Anthony Godett a hura ayera pa drenta parlamento, ku ta konta atrobe ku 21 miembro, tòg tin un situashon ku no ta deseabel. Ta trata di konstelashon di gabinete Pisas II.
E gabinete ta konta ku sosten di partidonan MFK i KEM i miembronan independiente Zita Jesus-Leito (èks PAR) i Corine Djaoen-Genaro (èks PNP). Sinembargo ta 5 minister di MFK ta okupá pa mas 3 luna kaba tur 9 kartera. E situashon aki ta di preokupashon manera entre otro partidonan MAN, PAR i PNP a trese dilanti den diferente entrevista i komunikado.
Tambe e partidonan tin indikashon ku por lo pronto e situashon aki lo no kambia pasobra informashonnan ku ta disponé di dje ta indiká ku kandidatonan pa minister di KEM i Jesus-Leito, Jason Fullinck i Raymond Jamanika respektivamente lo no a sali positivo den screening. “Nos ta hopi preokupá ku e situashon polítiko na Kòrsou”, PAR, MAN i PNPO ta bisa den karta pa presidente di parlamento, Charetti America-Francisca.
Na opinion di e frakshonnan Kòrsou ta den un káos kompleto despues ku for di ougùstùs 2024 partido MFK a kibra e koalishon ku Partido Nashonal di Pueblo (PNP). “For di e dia aki ta reina un insiguridat polítiko sin presidente. Pregunta ta, si kisas ta konsientemente MFK a kousa e situashon aki pa asina logra ku pa tres (3) luna kaba ta ministernan di e partido so ta tuma tur desishon den gobernashon sin niun klase di kontròl i transparensia.”
Pa e 3 frakshonnan aki ta hopi straño ku te dia di awe lider di gobernashon di Kòrsou, promé minister Gilmar ‘Pik’ Pisas, no por duna klaridat riba e situashon di inseguridat i futuro den gobernashon. PAR, MAN i PNP tin e fuerte impreshon ku MFK ta hasiendo mal uso di e situashon aki pa mantené konstelashon di gobernashon den e forma aktual. “Lamentabel ta ku Pisas komo lider di gobernashon mes no ta duna kara na pueblo i e órgano demokrátiko ku ta Parlamento.”
Konsiderando e situashon aki i konforme artíkulo 64 di Reglamento di Ordu di Parlamento PAR, MAN i PNP pidi un reunion públiko urgente riba e situashon polítiko i di gobernashon na Kòrsou. Lider polítiko di MAN-PIN, Giselle Mc William na algun okashon kaba a puntra públikamente ki dia Jamanika ta hura pa bira minister. E ta mustra kon e periodo di gobernashon di gabinete Pisas ta un di esnan ménos transparente den historia di polítika na Kòrsou.
“Gobièrnu no ta duna informashon na parlamento ni tampoko na komunidat pa medio di konferensia di prensa semanal di Konseho di Minister.” E falta di transparensia aki den e situashon polítiko ku ta reina, no ta aseptabel pa Mc William. “Pisas mester stòp di skonde kara, asumí su responsabilidat i hasi anunsio ofisial di e status di su gobièrnu manera ta spera di un promé minister ku ta respetá su pueblo.”
Tambe Mc William ta bisa ku e promé minister mester duna splikashon dikon despues di 3 luna ainda e kandidatonan pa minister no a hura. E lider di frakshon di partido MAN no por komprondé dikon a wanta nombramentu di Jamanika si tabata warda riba un otro kandidato di partido KEM drenta parlamento na lugá di Martines. NOTA: Texto ta scirbi den Papiamento fonetico di Corsou.
Na Corsou tin yamada pa un fondo di media independiente
WILLEMSTAD – Fundacion Kòrsou Transparente ta pidi pa mas colaboracion cu institutonan di media regional manera Media Institute of the Caribbean y pa crea un fondo di media independiente na Corsou. Esaki ta sali den un declaracion di e fundacion den ocasion di Dia Internacional contra Corrupcion, ayera. Segun e organisacion, un fondo asina ta necesario pa fortalece periodismo di calidad sostenibel y resistencia democratico riba isla. Media Institute of the Caribbean ta sirbi como un centro di conocimiento regional cu ta konekta medianan caribeño cu fondo internacional, entrenamiento y bolsa pa investigacion.
Corsou ta ricibi mas cu 5000 carchi pa cada partido’ pa mundial di futbol 2026
WILLEMSTAD - Presidente di federacion di football FFK, Gilbert Martina, a duna informacion diamars durante un conferencia di prensa tocante benta di carchi pa e partidonan di Corsou durante Copa Mundial di Futbol 2026. Segun Martina, Corsou ta ricibi mas cu 5.000 boleta pa cada partido. Desde diaranson 12 or di merdia, benta di carchi ta habri via website di FIFA. Martina a splica cu tur fan por ordena carchi desde diaranson y pago mester tuma luga februari aña sigiente.
DC-ANSP: Problema electrico a strobe servicio di controlador di trafico aereo dialuna pa Corsou
WILLEMSTAD - DC-ANSP, e proveedor oficial di servicio di trafico aereo pa Corsou, a duna informacion ayera tocante un incidente cu a sosode dialuna. Door di un fayo electrico, anochi por un rato no tabatin servicio di controlador di trafico aereo disponible pa e espacio aereo unda Corsou ta responsabel. Segun un comunicado di prensa, un sistema automatico di siguridad anti-fuego a activa inmediato y bombero a hasi un inspeccion preventivo. Tur señal ta mustra cu tabata un problema electrico. No tabatin candela y seguridad di personal ni di e facilidad no tabata den peliger na ningun momento.
Pisas tabatin reunion di crisis cu Reino tocante seguridad regional
WILLEMSTAD – Minister-president Gilmar Pisas a tene un reunion virtual ayera cu minister di Exterior di Hulanda, Caspar van Weel, y premiernan di Sint Maarten y Aruba tocante desaroyonan geopolitico recien den Caribe. Nan a papia tambe tocante tension rond Venezuela. Segun informacion oficial di Reino Hulandes, actualmente no tin indicacion concreto pa un amenaza agudo pa Aruba, Boneiru of Corsou. Reino ta sigui sigui wak desaroyonan den region cu mucha atencion. Gobiernonan di Hulanda, Aruba, Corsou, Sint Maarten y Boneiru ta tene reunion structural y regular pa intercambia informacion tocante seguridad, manehamento di crisis y preparacion pa posibel scenarionan cu por surgi den region. Den mesun marco ey, Aruba, Boneiru y Corsou ta traha riba diferente scenarionan pa enfrenta cualquier consecuencia futuro si esakinan surgi, cu apoyo di ministerionan relevante di Hulanda. Gobierno di Corsou ta enfatisa cu e ta pone enfoke riba pas, alerta y preparacion. Den relacionnan di Reino ta sigui tin colaboracion stret cu Hulanda, Aruba, Sint Maarten y Boneiru pa proteha stabilidad y seguridad regional, cu respeto pa norma internacional.
Jonckheer: Tension den region ta afecta turismo na Corsou
WILLEMSTAD – E situacion den region entre Merca y Venezuela tin hopi hende preocupa. E cos mas malo ta cu ningun hende sa kiko ta bai pasa. Asina Billy Jonckheer a bisa den e podcast 3or cu Gino. Jonckheer ta indica cu e ta riba cierto plataforma social caminda practicamente tur dia ta haci pregunta si ta sigur pa biaha den region di Caribe. “Mi sa di hende cu a cancela nan biahe pa Corsou debi na e situacion. Mi sa di hendenan cu a cancela nan reservacion pa bai pisca riba boto pasobra nan tin miedo pa sali riba laman.” Segun Jonckheer, tin hende asta ta duda pa bai Klein Corsou. “E situacion ta feroz y ta afecta turismo di Corsou.” Con grandi e efecto aki ta, Jonckheer no por bisa ainda, pero e ta anticipa cu cuanto mas grandi e problema entre Merca y Venezuela bira, ta mas grandi e impacto riba turismo di Corsou lo ta.
Na Corsou, uso di coriente y awa a subi fuertemente
WILLEMSTAD – Uso di coriente y awa riba Corsou a subi fuertemente durante 2024. Esaki ta sali den e raport anual di Aqualectra. Benta di coriente a crece rond 12%, mientras consumo di awa a subi rond 4%. Segun Aqualectra, e aumento tin relacion cu crecimiento economico riba e isla y temperaturanan mas halto cu den añanan anterior. Cs y negoshinan ta uza airco mas frecuente pa fria, loke ta subi demanda di coriente. Mesun condicion climatico ta causa cu gasto di awa ta subi tambe.
Follow NoticiaCla
