Opinion : Dia internacional di derecho di mucha y hoben

Posted on 11/19/2024 8:48 pm AST | Updated on 11/19/2024 8:49 pm AST

Scirbi pa sra mr. dr. Alida “Lily” Marval

E articulo aki ta un reflexion riba e derechonan di mucha y di hoben. Dicon mester a bin cu un Tratado di Derecho di Mucha y Hoben? E proposito pa bin cu e Tratado aki ta pasobra tabatin hopi abuso di mucha y hoben cu for di chikito mester a traha pa yuda trece cuminda na cas. Bay scol pa siña NO tabata existi y e cantidad di mucha y hoben cu no por a lesa ni skirbi tabata hopi grandi. Ainda nos por wak esaki na paisnan pober manera Haiti y varios pais na Centro y Sur-America, na Bangladesh y na hopi pais di Africa y Asia. Cu otro palabra: tur caminda.

Nacionnan Uni (United Nations) hunto cu UNICEF a cuminsa cu e tarea di skirbi un Tratado unda cu lo ancra especialmente derechonan esencial manera e derecho di carga un nomber y fam, di ta ciudadano di un pais; di tin mayornan cu obligacion pa mantene nan yuinan, pa manda nan yuinan skol pa siña skirbi y lesa y di e manera ey combati pobresa. Derecho di ser atendi pa un dokter ora di bira malo. Articulonan pa proteccion di mucha y hoben, manera NO maltrata nan, ni zuta nan, derecho di descansa, come y drumi. E ta zona straño pasobra e derecho nan aki ta zona normal den nos orea. Tog tin HOPI mucha y hoben na mundo cu nunca a drenta un scol y nunca a haya les, cu no sa lesa ni skirbi.

Esey tabata y ainda ta e meta principal di e Tratado aki. Tog a dura mas cu 10 aña pa e Ley internacional aki ser firma pa mas o menos 100 pais pa e bira un Tratado, un Ley internacional. Dicon? Pasobra hopi pais a bisa cu nan tabatin mester di e forza laboral di mucha y hoben pa nan economia. Paisnan manera India, China, paisnan na Africa, Sur-America y Medio Oriente. Ora bo cumpra paña, wak riba e label unda el a ser traha. Bo ta bay lesa nomber di e paisnan menciona arriba. Pasobra nan ta paisnan unda masha poco placa ta ser paga, loke nos ta yama CHEAP LABOR.

E paisnan aki tambe ta discrimina mucha muhenan y hende muhe en general. Na Afghanistan e mucha muhernan NO MAG bay scol pasobra na e país aki y algun otro paisnan unda tin Islam como religion, mucha muhenan NO mag bay scol. Nan ta prefera di mata nan cu manda nan scol. E paisnan aki ta discrimina mucha muhenan y hende muhe en general.

Por fin na 2001 e Tratado aki a bira realidad y e derecho di bay scol a bira un realidad. Desde e momento ey situacion pa mucha y hoben a cuminsa cambia mundialmente. No tur cos pareu pero tog un cambio positivo. Ainda falta hopi cambio.

Con e situacion ta na Aruba? Na Aruba bo por bisa cu tur hende sa lesa y skirbi. Esey kier meen cu nan no ta analfabeto. Skolnan ta ser subsidia pa Gobierno y mayornan no tin di paga hopi manera na otro paisnan. Tog tin hopi maltrato di mucha y hoben na Aruba. Maltrato verbal, psychologico of mental manera: bo no ta sirbi pa nada, bo ta handicap, bo ta bobo, bo ta mahos, bo ta pober etc. Esaki ta ser bisa hopi biaha pa e mayornan, mama, tata, wela y welo y mas miembronan di e famia.

Na scol tin maltrato verbal pa medio di maestronan di skol cu tambe ta papia di mesun manera cu e alumnonan; bullying dor di otro muchanan. No tin respet, ta haci otro dolo usando palabranan ofensivo. Den encuestanan haci mundialmente e sorto di abuso aki ta esun mas usa y mas doloroso pasobra e ta keda semper den bo mente y sentimento. E ta baha e estima propio di cada victima. Mucha y hobenan cu ta tende y mira e sorto di abuso aki lo haci mescos cu otro mucha y hoben. E abuso aki ta pasa di generacion pa generacion. Pesey e ta ser yama “e circulo vicioso”.

Si mayornan ta uza palabra malo cu otro, of e tata ta dal e mama y visa versa y e yuinan ta wak e espectaculo aki, e chens cu nan lo haci esaki ora nan bira grandi y forma un propio famia, ta grandi. Pesey e abuso aki ta ser pasa di generacion pa generacion. Y pesey e ta ser yama “violencia trans generacional”. E violencia aki hunto cu otro sorto di violencia manera violencia fisico y sexual, ta causa hopi daño emocional, fisico y mental y loke nos ta yama “trauma”. Esey kier meen cu e lo domina e bida di e victima pa semper. Abuso mental y sexual ta e abusonan cu mas daño ta causa. Ya Aruba a conoce casonan unda mucha y hoben a ser mata. Y tambe casonan di abuso sexual.

Mi ta desea di dedica algun conseho na e mayornan pa combati e abusonan aki. Wak con aboso mayornan ta trata otro. Cu respet? Of cu palabra malo, mahos y humiyante? Boso yuinan ta wak y tende boso. Boso ta “educando” nan den violencia. Nan ta bay haya e ehempel malo ey “NORMAL” y lo haci mescos ora nan bira grandi. Mescos ta conta si nan wak boso bebe alcohol of uza droga. Tin hogarnan na Aruba unda mayornan ta uza alcohol y/of droga y comparti esaki cu nan propio yuinan. Boso por rei con e muchanan aki lo bira ora nan yega edad di adulto. Si bo wak cuanto hoben di edad di 14 pa 20 aña ya conoce KIA paden, bo curason lo haci dolo! Siña papia na un manera respetuoso cu otro y cu bo yuinan. Splica nan kico ta malo y kico ta bon. Cu palabra, NO CU GOLPI. Na e hobennan mi conseho ta pa nan aprobecha cu na Aruba nan por studia y yega hopi leu. Haci bon uzo di esey. Prepara bo mes, bo bida y bo futuro.

Tin investigacion ta tumando luga pa haya sa dicon tin tanto maltrato di mucha y hoben na Aruba. Maltrato den famia. Loke nos ta yama INCEST, cometi pa propio miembronan di famia y hasta cu mucha chikito. Esaki mester cambia. Ban cuida nos muchanan y hobennan pa nan por haya e chens di sigui un bon estudio y alcansa un bon futuro cu un hogar bunita y harmonioso. No imita pa loco lo ke bo ta mira otro paisnan ta haci. Forma bo propio criteria, Respeta bo mes, bay semper pa miho, pidi Dios proteha bo y cuida bo, pero na prome luga cuida bo mes y cuida bo curpa. Ban traha duro. Ban saca cosnan y custumbernan mahos for di nos bida. Ban biba saludabel, positivo. Tin tanto cos bunita, trata otro bon. Cu respet. Yena bo bida cu balornan manera respet y amor pa bo mes y pa bo prohimo. Lo bo mira cu bo bida lo cambia pa miho y abo ta bira miho hende.

Como reflexion final mi kier trece lo siguiente padilanti como muestra con vulnerable e drechonan di mucha ta y con facil esakinan ta ser trapa y viola. Merca ta keda un atraccion pa e paisnan di Centro America y hopi famia, mama y tata ta trata di drenta Merca buscando un futuro miho pa nan mes y nan yuinan. Den e ultimo 4 aña hopi di e migrantenan aki a ser debolbi pa nan pais, hunto cu nan yuinan. Pero algo desastroso anti humano y anti e derechonan di mucha a sosode. E muchanan chikito cu ta depende di nan mayornan a ser ranca y separa for di nan mayornan. Hokinan grandi di hero a ser traha y nan a ser cera manera cacho. Algun mucha a bira malo y a muri. Djis pensa con e criaturanan chikito a sinti y ta sinti di ser ranca for di nan mayornan. Y e dolor di un tata y mama pa laga nan yuinan indefenso atras. Lo que ami ta haya hopi vergonzoso ta cu algun grupo pro defensa di derecho humano so y algun politiconan so na Merca a desaproba e accion aki.

Na Europa e reaccion tabata mas fuerte. Como e atake riba e hecho aki a bira mas fuerte den e re-eleccion pa presidente biaha pasa, ordo a ser duna pa averigua si tur e muchanan tabata den e “foster-homes” unda nan a ser destina. E resultado? Mas di mitar di e muchanan NO A SER HAYA. SPOORLOOS. Bo sa kico esey kier meen? Cu e muchanan aki probablemente a cay den mannan di hende malvado manera pedofielnan, prostitucion, esclavitud den trabounan forzoso! Esey ta un dolor grandi y un berguensa pa henter HUMANIDAD. Ban wak kico ta bay pasa.

Como ultimo punto mi kier pone boso atencion riba e hecho cu Merca, e pais cu ta yama su mes mas democratico, NUNCA a firma e Tratado Aki. Dicon? Nan a uza 2 motivo clabe pa nan: 1. Nan NO kier pa ningun hende ni un Tratado bisa nan con pa trata nan hende, especialmente nan yuinan. Esaki tin di haber cu maltrato y batimento di mucha ta prohibi. 2. Merca kier mantene e posibilidad di por ehecuta (MATA) un menor di edad na nan Pais. Esaki a yega di sosode. Tin un caso cu un mucha homber di 11 aña, color scur, a ser ehecuta pasobra un compañerita di scol y di color blanco a bisa cu e mucha homber aki a molostie sexualmente! Probablemente e a ripiti loke e tabata tende den su circulo di famia unda tabatin discriminacion. Hopi aña despues, e mesun mucha muhe aki a haña remordimento y a confesa cu loke el a bisa NO tabata verdad. Awor nos tin DNA pa confirma cu esaki NO tabata berdad. Ken por kita e dolor di su mayornan? Djis sinta pensa. Anos, un isla chikito NO tin PENA DI MORTO den nos Constitucion! Por fabor: CUIDA BOSO YUINAN.