A pidi 60 luna di prizon reparti entre reporteronan pa sospecho di soborno di polis

ORANJESTAD – Fiscal a pidi 24 luna di castigo di prizon pa reportero Nelson Andrade, pa su participacion den soborno activo di un agente policial (ambtenaar), violacion di secrecia di trabou y miembro di un organisacion criminal. Coleganan reportero Richard Lacle, Norben Giel y Brian Koolman, tambe a tende demanda di castigo di prizon aunke menos (18 luna incondicional) ,y pa Koolman, te hasta un castigo completamente condicional. E demanda ta parti di e caso penal New York unda cu anteriormente e agente policial Vos a keda sentencia na December di 2023 pa soborno pasivo, violacion di secrecia y miembro di un organisacion criminal. Huez ta dicta sentencia dia 18 di December proximo

E REKISITORIO  

Segun e rekisitorio di e fiscal, e ta kere cu hopi cos y informacion a keda comparti entre e agent policial y e tres periodistanan. Pero e realidad ta cu mester por proba cu prueba, cu loke a sosode tabata ilegal. E trafico di informacion colecta di whatsapp entre e sospechosonan durante periodo di apenas un luna, tabata suficiente pa haya un bista di e operacion entre e polis y e tres periodistanan. 

ORGANISACION CRIMINAL

E fiscal a sigui bisa cu hopi biaha ora cu un hende scucha di ‘miembronan di un organisacion criminal’, nan ta imagina un grupo di hende seriamente arma, cu intencion di haci hopi daña manera atraco di un lugar of violencia teribel. Pero e realidad ta cu den termino hudicial, dos hende cu ta malversa y konkel cifranan di contabilidad den un compania, mes ta suficiente pa wordo mira como miembro di un banda di criminal. Pues dos hende so caba, ta suficiente pa califica nan como un banda criminal. 

ZWIJGRECHT

E derecho di zwijgrecht, osea derecho pa keda keto, ta un derecho cu cada sospechoso tin den corte, y ta wordo atendi riba dje na comienso di cada caso. Y huez a atende tur sospechoso riba e derecho aki. Dos di e sospechosonan, Andrade y Giel, a haci uso di esaki. Sinembargo, segun e fiscal, e ‘derecho’ aki tin su consecuencia negativo. Esaki pasobra e no ta crea claridad den un acto y hopi biaha ta conduci na un declaracion culpable. Ademas segun e fiscal, keda keto, por tin consecuencia pa cu e castigo. Un huez por usa e acto aki den su consideracion pa cu un sentencia, y no ta uno positivo. E silencio ta implica cu e sospechoso no ta tuma responsabilidad pa esaki. 

NO A SIÑA SU LES

Riba e caso di sospechoso A, e fiscal tabata mas specifico. E fiscal a recorda cu no ta prome biaha cu Andrade ta den un caso asina, unda cu ya caba e la haya un chens, cu un sentencia ‘liviano’ esta castigo di prizon condicional y trabou comunitario. Pero parse cu e no a siña su les y atrobe ta envolvi den un caso similar. Y como tal, e castigo di dje lo ta esun mas pisa di tur.