Noticiacla ta inicia diaranson cu e prome di un serie di 11 programa politico “Democracia Cla’ cu 11 lider politico

ORANJESTAD – Den cuadro di e proximo eleccion parlamentario di Aruba di dia 6 di December 2024, Noticiacla ta inicia su serie di 11 programa titula ‘Democracia Cla, Na caminda pa eleccion 2024’. E intencion ta pa durante e 11 programanan, e moderador Tito Laclé papia cu e 11 lidernan politico (lijsttrekkers), durante e siguiente simanan. 

CONTENIDO

E intencion ta pa papia cu e lidernan politico contesta un serie di pregunta preselecta riba varios tema, elabora riba nan campaña, progreso di e partido, programa di partido, futuro politico y mas. Lo tin un serie di pregunta identico pa tur lider, pero tambe preguntanan specifico pa e lidernan (lijsttrekker) contesta durante e programa. E intencion ta pa na final di cada programa, esun cu a wak e programa, ta mucho mas miho informa di no solamente e programa di e partido politico, pero tambe tin un bista miho di e lider politico. Pues un bista amplio y completo pa asina e por tin mas informacion posibel, pa por dicidi (si e no a dicidi ainda), pa ken y cua partido e vota dia 6 di December 2024. 

PROGRAMANAN 

E programanan lo ta en bibo, entre dialuna pa diahuebs, tur siman cuminsando diaranson 13 di November 2024 pa 8:30pm y terminando cu e ultimo programa dia 3 di December 2024. E excepcion lo ta dia 14 di November cu tin debate di Camara di Comercio, pa cual lo no tin programa e dia ey. E siguiente dialuna ta sigui cu e siguiente lidernan. 

CONFIRMA

Tur e 11 lidernan (lijsttrekkers) di e respectivo partidonan a confirma nan participacion pa e respectivo fechanan cu nan a haya y lo ta presente tambe. 

TRANSMISION

E biaha aki e programa lo no ta acesible riba Facebook, sino via e canal di YOUTUBE di Noticiacla, e website (LIVE) y App (LIVE) di Noticiacla simultaneamente. Pa por mira e programa,  por click riba e link pa e canal AKI, y subscribi mesora tambe pa ora cu e proximo programanan cuminsa, e canal avisabo.