Aruba ta habri siman registrando e di 10 morto den trafico pa 2024

ORANJESTAD – Aruba dialuna a habri, conociendo su di 10 morto di trafico pa 2024. Tabata dialuna marduga   pa mas o menos 4:50 di mainta, cu central di polis a wordo notifica di un accidente serio na e retonde na Bushiri.

E prome informa a indica cu tabata trata di un accidente di un solo auto te ainda. Central a despacha patruya di polis na e sitio como tambe ambulance.

Na yegada di e prome patruya di polis a bin topa cu e auto Nissan modelo Tiida color cora numera A-79008 y cu e chauffeur den e auto no tabata reaciona. 

A pidi pa materialwagen di Brandweer mirando cu e chauffeur tabata pega den e auto. Personal di Brandweer a saca e victima for di e auto, pa despues paramediconan brind’e asistencia medico. Pero lamentablemente no por a haci muchu mas pa e victima.

Specialista di trafico a presenta na e sitio como tambe polis forensico y dokter forensico Voskuil. 

Dr.Voskuil a constata morto di Yonathan Ysaac Velasquez Campos naci 02-08-1976 (48 aña) na Venezuela.

Departamento di slachtofferhulp a presenta na e sitio tambe. 

Noticiacla y Cuerpo Policial ta manda palabra di condolencia na famia di e fayecido.