- Corte Superior a pospone caso Sayuri pa haya mas informacion
- Aruba Bank Walk & Run 2025 a ranca sali cu participacion masal
- Delegacion di Parlamento di Aruba a reuni cu Home Land Security na Merca
- Frontier Airlines ta lansa buelonan nonstop entre Atlanta y Aruba
- Op=Op Voordeelshop Aruba a partner un biaha mas cu Aruba DOET
DLI: Bo derecho encuanto oranan liber di trabou pa eherce bo derecho di voto!
ORANJESTAD – Conforme e eleccion parlamentario di dia 6 di December proximo, articulo 40 di ordenansa electoral ta bisa e.o. cu Tur dunado di trabou ta obliga di percura pa su trahado, cu tin derecho di voto, tin riba dia di eleccion durante e tempo stipula den articulo 39 pa vota minimo 4 ora di trabou consecutivo liber, a menos cu e trahado durante e oranan cu e eleccion ta tuma lugar ya caba tin 4 ora consecutivo liber riba un otro base.
Ademas e articulo ta bisa cu E dunado di trabou ta obliga di percura pa mas tarda un siman prome cu e dia di vota, e tempo cu e trahado ta haya e oportunidad pa vota, wordo poni na su conocemento.
CON MESTER INTERPRETA ESAKI
Esencia di articulo 40 §1 di Ordenansa Electoral ta cu e dunado di trabou mester percura pa den su compania e trahadonan cu tin derecho di voto riba diabierna 06 di december proximo haya por lo menos 4 ora consecutivo liber den e periodo cu local di votamento (stemlokaal) ta habri, pues entre 8 or di mainta y 7 or di anochi. E pensamento tras di esaki ta cu tur trahado cu tin derecho di voto mester haya suficiente oportunidad pa haci uso di esaki.
EXCEPCION
E trahado cu den e periodo cu local di votamento ta habri ya caba tin 4 ora consecutivo liber riba otro base (p.e. e trahado normalmente ta traha mita dia so of e trahado tin un shift hopi tempran of hopi laat), no por haci un apelacion serca su dunado di trabou pa e 4 oranan di trabou liber.
EHEMPEL
Como ehempel tin e siguiente muestranan:
• E votado cu ta traha di 7:30 or te 12 or di merdia y di 1 or te
4:30 or di atardi lo mester haya liber di 7:30 or te 11:30 or di merdia of di 12:30 or te 4:30 or di atardi.
• E votado cu ta traha ‘part-time’ di 8 or te 12 or di merdia no por haci apelacion riba e 4 oranan di trabou liber.
• E votado cu ta traha shift di 7 or di mainta te 3 or di merdia tampoco por haci apelacion riba e 4 oranan di trabou liber. Esaki ta conta tambe pa e votado cu ta traha un shift di 12 or di merdia pa 8 or di anochi of un shift di 3 or di merdia pa 11 or di anochi.
Adicional na e obligacion di e dunado di trabou pa permiti su trahadonan cu tin derecho di voto e tempo liber pa nan eherce nan derecho di vota,
articulo 628 §4 y §5 Codigo Civil di Aruba ta stipula cu e trahado ta mantene su derecho riba salario pa e oranan liber cu e ta haya pa eherce e derecho aki.Departamento di Labor y Investigacion ta pidi tur trahado y principalmente dunadonan di trabou pa tene bon cuenta cu e informacion aki.
Delegacion di Parlamento di Aruba a reuni cu Home Land Security na Merca
WASHINGTON - Dialuna e delegacion di Aruba di Parlamento tabatin un reunion clave na e Departamento di Seguridad Nacional na Washington. E bon relacion aki ta vital pa construi riba e logronan obteni y fiha obhetivo nobo pa futuro cu ta mantene Aruba como e unico isla den e reino di Hulanda cu tin pre-clearance pa Merca. Nos pilar economico ta depende riba nos siguridad.
UNDP y Gobierno di Aruba ta reafirma compromiso strategico pa Desaroyo Sostenibel
ORANJESTAD - UNDP y Gobierno di Aruba ta reafirma compromiso strategico pa Desaroyo Sostenibel. Prome Minister mr. Mike Eman hunto cu Minister mr. Gerlien Croes y Minister drs. Mervin Wyatt-Ras a tene un encuentro cu sr. Ugo Blanco, Representante Residente di United Nations Development Program (UNDP) pa Aruba, Corsou, Sint Maarten y Trinidad & Tobago. E bishita aki ta reconecta e cooperacion strategico entre Gobierno di Aruba y UNDP, pa cu e Obhetivonan di Desaroyo Sostenibel (SDG’s) di Nacionnan Uni.
Szabó: Sector empresarial cu rol mas grandi den parti Caribense di Reino
ORANJESTAD - Sektor empresarial ta bai haña un ròl mas grandi den e kolaborashon ku e isla- i paisnan karibense den Reino. Ta bai stimulá empresario lokal dor di trese sèn di Gobièrnu Sentral hulandes i partidonan privá lokal huntu. E aserkamentu nobo akí ta e promé ku ta hasi uzo di e 24 mion euro ku gabinete a pone na disposishon pa produkshon di kuminda fresku.
Gerlien Croes: SETAR a inverti mas di 1 miyon pa conecta 83 scol riba fiber
ORANJESTAD — SETAR a inverti mas di 1 miyon pa conecta 83 scol riba Fiber. Minister di Educacion y Innovacion, Gerlien Croes, tabata presente recientemente manera cu Noticiacla a raporta caba, conhuntamente cu Minister Arthur Dowers (encarga cu telecomunicacion ad interim), na SETAR N.V. pa e anuncio oficial di un logro importante pa Aruba: tur scol di nos isla lo ser conecta awo riba e netwerk di fibra optico (Fiber Optic), un paso cu ta sostene un sistema educativo moderno y inclusivo.
Eman: Gobierno ta studiando pa baha of elimina e 5% prima di AZV pa nos pensionadonan
ORANJESTAD - Gobierno ta studiando pa baha of elimina e 5% prima di AZV pa nos pensionadonan. Minister-president Eman a anuncia cu Gabinete AVP-Futuro actualmente ta haciendo un estudio pa baha of elimina completamente e 5% prima di AZV cu e pensionadonan ta paga, pa esnan cu un ingreso anual bou di 30.000 florin.
Gabinete AVP-FUTURO a prolonga ciere di frontera cu Venezuela
ORANJESTAD – Gobierno di Aruba a prolonga e ciere di frontera cu Venezuela cu 4 luna mas. Asina e premier Mike Eman a bisa diadomingo. Cu esaki, e ta sigui e maneho di e gobierno anterior cu cada bez tabata prolonga e cierre cu prome 3 y awor 4 luna. E situacion no a mehora segun Eman y cu e situacion geopolitico actual hopi insigur, a opta pa mantene e frontera cera. Esaki no obstante e hecho cu Corsou si tin e frontera habri tanto aereo como maritimo. Aruba tin e frontera habri solamente maritime. Segun Eman, e ta depende di Hulanda con liher e frontera ta habri. Durante e campaña electoral, e politico e tempo ey a boga pa habri e frontera como un di su prioridadnan. Pero esaki a resulta mas dificil.
Follow NoticiaCla
