Partido Red a logra su 586 firma diahuebs merdia

ORANJESTAD – Algo despues di 1’or di diahuebs atardi, partido RED Democratico tambe a haya notificacion cu nan a yega e cantidad di firma rekeri di 586 firma, cu a sigura nan participacion na e eleccion di 6 di December 2024. Un punto interesante ta cu e partido tabata sigura cu nan firmanan tabata ‘organico’ esta original y no cu ayudo di otro partidonan cu a firma ‘djis pa sostene’ pero cu no ta traduci den voto. Con esey ta contrable,no ta conoci ainda pa Noticiacla. Faltando 4 dia (incluyendo awe) pa partidonan politico colecta suficiente firma (586) pa sigura nan participacion den e proximo eleccion (December 2024), awor ta keda 4 partido cu ainda ta den e ‘careda’ aki.  . E partidonan cu falta ta CURPA, HTC, MIA y UPP. 

Partido CURPA tabata falta 227 firma, sigui pa HTC cu falta 330b firma. E dosnan cu ta mustra cu nan lo no logra, aunke cu falta 4 dia, ta MIA y UPP. Ambos ta bayendo hopi lento. Pero, tin 4 dia y tur tin posibilidad pa logra esaki. 

YUDA PA OTRO PARTIDO

Ayera un biaha mas tabatin e comentario comun cu e partidonan menos ‘comun’, manera LPR, a haya ayudo di partidonan manera MEP, ora cu un voicenote a plama di parlamentario Hendrik Tevreden pidiendo hende pa firma e lista di LPR, pero pa vota pa MEP den e proximo eleccion. Noticiacla no por a verifica (ainda) cu Tevreden, cu realmente ta su persona, aunke cu e voz y e informacion ta duna e indicacion si cu ta Tevreden.