LPR tambe a logra su firmanan pa participa na eleccion 2024

ORANJESTAD – Diamars a cera sin cu un di e 6 partidonan politico cu mester firma ainda, a logra nan meta. Esun cu a yega mas cerca, sinembargo, tabata partido Lucha pa Reforma (LPR) di Rycond Santos Do Nascimento cu a cera cu 543 firma, faltando ‘apenas’ 43 firma. Nan pensamento tabata cu nan lo logra esaki pa e update di diaranson merdia, sigurando nan participacion tambe na e proximo eleccion. Y faltando mei ora pa yega, LPR a logra e cantidad. Esun cu awor ta mas ‘mal’ para, ta e partido UPP, cu te cu diamars anochi a logra ‘apenas’ 20 firma. Partido MIA tambe no ta mirando mucho progreso, unda cu nan tambe e logra un total di ‘apenas’ 28 firma. Y ambos a logra masha poco firma , 3 y 7 respectivo pa partido, compara cu e cantidad di 17 y 21 respectivamente cu nan a ricibi riba e prome dia. 

SIGUIENTE PARTIDO

Despues di LPR, e siguiente partido cu ta moviendo, ta RED cu a cera cu 395 firma, faltando 191 firma ainda cu mientrastanto a bira 175. E chens ta cu pa e siman aki ainda, nan tambe por keda cla. Den e ultimo eleccion, como cu RED tabata den Parlamento, nan no mester a colecta firma. Ta sigui e partido CURPA, cu a cera cu 265 firma, faltando 321 firma cu a bira 300 mientsatanto. Na 2021, e partido a logra su meta den 5 dia. Y e partido di hoben, HTC, a logra ‘apenas’ 143 firma den dos dia di tempo. Nan chens tambe ta menos, mirando e dianan cu falta y cu te cu diaranson merdia, tabata falta 400. . Na 2021, HTC a logra cera nan firmanan den 4 dia, ora cu e cantidad di firma rekeri tabata 587. Pero e aña ey tambe, e cantidad cu nan tabata ricibi pa dia, tabata surpasa 100 firma. Riba e ultimo dia, te hasta, nan a ricibi 264 firma. Partido UPP den 2021 a logra cera nan firma den 3 dia. Y den comparacion, e partido (bou di otro liderazgo) aworaki no ta mustra cu nan ta logra, aunke ainda tin 5 dia pa bay.