Ponson: Hopi dificil pa Aruba ricibi pagara pa cera fin di aña

ORANJESTAD – Ta premira cu sea no tin pagara pa tira fin di aña, of e cantidad ta hopi limita mes, pa no bisa cu no tin nada. Combersando cu e experto di explosivo pa DOW, Rubin Ponson, e ta bisa cu no tin ningun indicacion cu e aña aki lo tin pagara pa tira. Si tin, ta di e importadornan mes cu por opta pa keda cu loke nan mes a keda cune. Pero no cu lo importa cargamento di pagara manera cu nos conoce. Ponson a confirma cu definitivamente no tin ningun barco di China pa Aruba e aña aki. 

OTRO POSIBILIDAD

Segun Ponson, e scenario probable ta cu por tin importadornan cu ta bay busca vuurwerk via Merca, pero cu esaki lo ta un cantidad limita, y no ta contene pagara. Ta trata di otro tipo di vuurwerk, cu ta conoci na Merca, pero sigur no pagara, y sigur no e tiponan cu nos conoce di cantidad grandi di tiro. Y si logra trece vuurwerk mes, cu no ta pagara, e prijs lo ta mucho mas caro pasobra cumpra vuurwerk na Merca, no ta sosode a base di ‘costo’ pues mester paga mas pe, cu ta nifica cu lo bende consecuentemente mas caro tambe na Aruba. Y esaki por bira un problema mirando cu e situacion na Aruba no ta permiti pa cumpra vuurwerk si e ta mucho mas caro.