Tur wowo ta riba 8 partido politico cu mester di 586 firma pa participa na e eleccion

ORANJESTAD – Tur bista e siman aki, cuminsando dialuna 21 di oktober 2024, ta riba e 8 partidonan politico cu tin 7 dia di trabou pa colecta e cantidad di 586 firma, pa asina sigura nan participacion na e eleccion parlamentario di dia 6 di December proximo. Nan a entrega nan lista di candidato conforme ley, pero awor ta inicia e proceso di firma. Experiencia ta bisa cu ta custumber cu mayoria di e partidonan ta logra, no necesariamente pasobra nan tin e sosten di nan hendenan, sino cu ta un strategia di partidonan ‘grandi’ pa ‘yuda’ cu e firmanan aki, cu na final por yuda nan bek. 

E PROCESO

E proceso ta cu cualkier persona cu ta por vota legalmente den e proximo eleccion, por pasa na un di e tres lugarnan stipula, e dependance di Censo na Playa, of e MFA na Noord y Savaneta entre 9’or di mainta y 8’or y mei di anochi entre 21 y 29 di oktober, excluyendo e diasabra y diadomingo cu ta entre e fechanan ey.

STRATEGIA

Manera a bisa, ta custumber cu mayoria di e partidonan ta haya nan cantidad di firma rekeri, no pasobra nan ta ‘asina popular’, sino cu nan ta haya ‘ayudo’ di e partidonan grandi, cu na su turno por yuda e partidonan grandi, door cu mas partido participa, e ta yuda cu e restzetel reparti. Den pasado, partidonan cu a haya e cantidad di firma necesario, despues cu e resultado di eleccion, a basta menos voto. Entre nan tin partidonan HTC y CURPA cu a haya apenas 249 y 312 voto, mientras cu ambos a keda cla den 5 dia cu nan cantidad di firma rekeri. Tin partidonan cu a logra esaki den e prome dia, cu tabata partido MAS den su prome intento na 2021 cu na cabez Marisol Tromp.