Gobiernu di Corsou ta dialoga awe nochi riba playanan na Lagun

WILLEMSTAD - Gobièrnu a emití invitashon na públiko pa un diálogo habrí riba e dos playanan, Jeremí i Lagun na Banda Bou. Esaki despues ku gobièrnu na inisio di luna a hasi apertura pa bai drecha e playanan. Loke no a kai na agrado di habitantenan di Lagun ètòl ta ku ta bai konstruí mei mei di e santu, lanta un edifisio di betòn. Na Jeremí parti ariba a kap palu pa bai konstruí otro fasilidat. Segun e gruponan kontra di e desaroyo di betòn na e playanan, e playanan ta pèrdè nan originalidat. Tambe tabatin kolektamentu di firma i akshon ku ta pidi pa para e konstrukshonnan di betòn na ámbos playa. Relashoná ku esaki, gobièrnu a indiká ku e ta rekonosé e preokupashon ku a lanta ora nan a anunsiá e inisiativa pa drecha i embeyesé e 2 playanan. Gobièrnu ta duna balor na bos di pueblo, i p’esei kier stimulá un diálogo habrí kual ta esensial pa komprenshon mutuo. E foro públiko ta kaminda ta skucha perspektiva dje siudadano, atendé e preokupashon i traha huntu pa yega na un solushon ku ta benefisiá e komunidat. Promé minister sr. Gilmar Pisas lo ta presente na e diálogo ku ta tuma lugá awe nochi 6:30 na Sentro di Bario Lagun. Ademas por sigui e seshon “online” via kanalnan ofisial di gobièrnu di Kòrsou. NOTA: Texto ta scirbi den Papiamento fonetico di Corsou.