Discusion ta sigui si detencion di reportero na oficina di Landsrecherche tabata legal of no

Discusion ta sigui si detencion di reportero na oficina di Landsrecherche tabata legal of no

Posted on 10/9/2024 10:22 am AST | Updated on 10/9/2024 10:23 am AST

ORANJESTAD – Durante e cobertura di e detencion di ex-minister Glenbert Croes diamars atardi na edificio di Landsrecherche, un colega reportero di e medio 24ora.com, Marko Espinoza a keda deteni pa un miembro di Landsrecherche. Segun abogado cu a asisti Espinoza, mr Zuhaila Arends-Marchena, ta acusa Espinoza di ‘huisvredebreuk’, osea violacion di espacio of ‘invasion’. E detencion,- manera por a spera -, a causa conmocion sigur pa e medio cu Espinoza ta representa, pero tambe pa demas medionan di comunicacion local. Ademas esaki a crea un reaccion y comentario riba rednan social pa e forma con e detencion a tuma lugar, y a cuestiona si esaki tambe tabata corecto.

KICO A SOSODE

Tabata ora cu e ex minister a caba wordo procesa y hinca den e van di CEA pa wordo transporta pa un cel di polis, cu Espinoza tabata saca potret di e momento aki, ora e detencion di e reportero a tuma lugar. Diripiente un persona fememino Hulandes a pidi Espinoza pa bandona e sitio. Espinoza a puntra e persona pa identifica su mes, puntrando e pa su nomber y fam. E señora Hulandes no a contesta Espinoza pero a want’e y ora cu Espinoza no kier a bandona e sitio, e señora a informa Espinoza cu e ta keda deteni, y a hibe paden, asisti pa mas personal di Landsrecherche. 

ESCOLTA POLICIAL

Remarcable tabata cu a opta e ora pa asistencia di polis pa transporta Espinoza pa un warda di polis pa su detencion. Por lo menos 3 pa cuater polis a sak’e algun rato despues na boei for di e edificio di Landsrecherche, hink’e den un auto di transporte di polis. E auto a mobilisa pa warda di Shaba, y na caminda despues a keda asisti pa un otro patruya, completo cu sirena y zwaailicht, direccion pa warda di Shaba. Na e warda, a hinca Espinoza den un camber, pa despues e wordo asisti pa abogado Arends-Marchena. Despues di algun rato, Espinoza a keda den libertad atrobe, pendiente un cita cu Ministerio Publico. 

LEGAL OF NO

Espinoza a sigura despues cu ningun momento e persona Hulandes cu a ‘detene’, a identifica su mes como oficial di Landsrecherche, pa cual e la resisti. A surgi e pregunta, si e detencion tabata uno legal of no, mirando cu e persona no a identifica su mes, y ademas no tabatin ningun indicacion publicamente marca, cu e area unda cu Espinoza tabata ora di su detencion, tabata parti di propiedad priva of no. Abogado Arends tambe ta cuestiona e detencion, argumentando entre otro cu mientras cu su cliente a keda deteni, e coleganan cu tabata eynan tambe, si no a keda deteni. Si e tabata consecuente, mester a detene tur e coleganan pafo cu tabata cu Espinoza.

LIBERTAD DI PRENSA VIOLA

Tambe ta surgi e pregunta cu si aki a viola libertad di prensa, of cu si e reportero a abusa di su poder y no sigui orden duna pa un oficial di husticia. E discusion aki ta varia dependiendo varios abogado riba e tereno aki. Un otro abogado cu a vocifera su opinion riba red social, Dello Gomez ta bisa cu aunke cu no tin marcacion legal pa determina teritorio traspasa, y cu e persona cu a detene Espinoza no a identifica su mes, nada di esaki ta necesario y cu e reportero (cu si tabata identifica cu su uniform:red) lo a actua robez. Potret cortesia 24ora.com

  • Powered by SETAR