Vd Wal: No ta trata paisnan Caribense den Reino igual den cuadro di supervision financiero!

ORANJESTAD – “Paisnan Caribense den Reino no ta wordo trata igual den cuadro di supervision financiero”. Asina ex miembro di e colegio di supervision financiero pa Aruba, CAft, Hellen van der Wal a bisa recientemente den su discurso di despedida. Noticiacla den un cantidad di articulo ta reproduciendo partinan di e discurso, cu a mustra interesante unda cu van der Wal ta basta critico riba e funcionamento di e colegio. Pa loke ta su observacion riba e trato no igual, e ta mustra por ehempel con e introduccion di supervicion financiero na Sint Maarten y Corsou a bai kompañá pa restrukturashon di debe. Esaki ta splica tambe pakico e paisnan ey a bay di acuerdo na 2010 pa regula supervision financiero na nivel gubernamental. Segun van der Wal ta sigui bisa, supervision den e paisnan ei ta basa riba e asina yama regla di oro. Asina ta haci’e mas facil pa e paisnan ey haci inversionnan, specialmente pasobra a regla cu nan por fia barata via Hulanda. “LAft, di otro banda, ta enfoca riba reduccion di e debe nacional debi na e situacion financiero na e momento ey. Inversionnan mester cuadra den e presupuesto. P’esei, prestamo pa esaki ta efectivamente imposibel” van der Wal ta sigui bisa.”Prestamo ta aumenta e debe nacional. “Ademas LAft no tin ningun facilidad pa prestamo barata via Hulanda”.

TA TRATA ARUBA MAS DURO CU HERMANA ISLANAN

“Tambe mi a experencia cu Aruba ta wordo trata mas duro cu nos hermana islanan. Nos ta corda cu dos aña pasa CAft a conseha RMR pa duna Aruba un instruccion: apesar cu e presupuesto tabata na ordo, CAft tabata malcontento cu e splicacion. Sint Maarten, di otro banda, cu nunca no a entrega un presupuesto na tempo for di 10-10-10, aparentemente por haci esaki ku impunidad” van der Wal ta sigui bisa.

RMR NO A ADOPTA CONSEHO PA EMITI INSTRUCCION

Dos aña pasa, RMR no a adopta e conseho pa emiti un instruccion na Aruba. Un bon kos segun van der Wal, aunke tabatin fayo den e splicacion, e presupuesto riba su mes tabata realístico. “Pasobra finalmente e aña ey en cuestion a termina cu un surplus chikito”, van der Wal ta sigui bisa.

CONDICION PA INTERES ABOU

Un otro ehempel di diferente trato di e paisnan segun van der Wal, tabata cu como condicion pa interesnan abou ora di refinancia e fiansanan di Covid, Corsou y Sint Maarten mester a bini cu un solucion pa Ennia. E autonomia di e paisnan ey no ta limita pa un acuerdo asina. “Aruba ta wordo exigi pa bay di acuerdo cu un ley nacional di supervision financiero, mientras cu Aruba ta den mucho mas mihor termino economico y administrativo (tambe riba termino mas largo) cu ambos hermana isla” e ex miembro di CAFt a sigui bisa. 

LEY DI REINO 

“Si e Leiy di Reino ey mester wordo introduci (pasobra esei lo ta atrobe un escoho polítiko), e ora ei mi lo conseha pa e contenido di e Ley di Reino cumpli cu e conseho di e Conseho di 2015. Pero mi lo argumenta acsolutamente cu e normanan di presupuesto mester ta inclui den un ordenansa nacional pertenece. No tin motibo pa hasi esaki diferente na e momento aki!”

SUPERVISION FINANCIERO

“Den mi opinion”, van der Wal a sigui bisa, “supervicion financiero como un institucion lo beneficia di tene mas cuenta cu e tereno di wega legal y constitucional”. Esaki, segun van der Wal, ta aumenta e legitimidad y aceptacion di e conseho na tur dos banda di laman. “Asina tambe ta evita cu consehonan no ta wordo sigui, manera e conseho di CAft dos aña pasa pa emiti un instruccion na Aruba, cu perdida di cara innecesario pa CAft” van der Wal a finalisa bisando.