Ex minister Oduber no ta participa den proximo eleccion cu partido PAIS

ORANJESTAD – Ex minister Otmar Oduber, ta mustra di lo no participa den e proximo eleccion. Por lo menos no cu e Plataforma PAIS.  Un di e motibonan principal ta cu Oduber mes a confirma dialuna mainta na Noticiacla cu partido “PAIS no a keda inscribi”. Cu esaki, ta haci dificil pa participa cu e plataforma ey. Mes momento, e la sigui informa cu e la tuma un decision na nivel personal y familiar. “Diaranson lo tene un reunion cu mi hendenan y participa esaki na nan pa nan pensamento y diaranson mes lo participa esaki na comunidad” e ex minister a sigui bisa. E no kier a bisa mucho mas, sino e loke e la bisa anteriormente. 

FOR DI ELECCION OF NO?

Cu esaki, e opcionan ta keda minimo unda cu un partido nobo di Oduber no ta bira un realidad. E por subi partido di otro persona, y wak con por logra esaki, of busca un partido cu ta registra pero cu ta ‘bashi’, manera cu a sosode cu Marisol Tromp cu a busca un partido existente cu no tabata activo, pero si registra, y trece bida den esaki. No ta conoci si esaki ta e posibilidad. E hecho cu Oduber ainda tin cu papia cu su hendenan y lo haci un anuncio, ta laga e posibilidad aki habri ainda.