Na Corsou, negosacion pa acuerdo di gobernacion ‘nobo’ canando positivo
WILLEMSTAD - Partidonan MFK, KEM i miembro independiente di parlamento Zita Jesus-Leito a reuní djárason 4 sèptèmber riba e anekso (“addendum”) na e akuerdo di gobernashon di gabinete Pisas II. Den e anekso aki ta pone e kondishonnan di KEM i Jesus-Leito pa nan duna nan sosten na e gabinete.
Intenshon ta ku e partidonan ta firma e anekso aki djaluna 9 sèptèmber. E fecha aki ta tentativo ainda. Tabata e intenshon ku e anekso ta keda kla promé ku apertura di aña parlamentario nobo ku lo ta djamars 10 sèptèmber.
26 i 27 di ougùstùs KEM i Jesus-Leito a hiba deliberashonnan separá ku e tim negoshadó di partido MFK pa yega na e anekso. Nan a entregá nan puntonan ku e ke mira atenshon pe den e akuerdo di gobernashon i djárason último pues a repasá e puntonan.
Sin por bai den detaye kolaboradó di frakshon di KEM, Anthony Godett ta konfirmá ku partidonan a sinta i ku e desaroyonan ta positivo. Tin e speransa ku pronto partidonan por firma e dokumento.
Tabata gobernadó Lucille George-Wout despues di a risibí e kartanan di sosten di KEM i Jesus-leito pa gabinete Pisas II a indiká ku partidonan mester traha riba un anekso.
Den un karta fechá 21 ougùstùs i firmá pa tur 9 miembro di parlamento pa MFK ta bisa ku mirando e akontesimentunan di último dianan, inkluso den parlamento kaminda parlamentario Sheldry Osepa (PNP) a hasta yama MFK partido inkonfiabel i parlamentario Gwendell Mercelina (PNP) ta tilda MFK di tur sorto di kos, frakshon di MFK no ta dispuesto mas pa sigui traha den koalishon ku e 2 parlamentarionan pa PNP. Lider polítiko di PNP, Ruthmilda Larmonie-Cecilia a haña e karta aki djárason mainta for di man di promé minister Gilmar ‘Pik’ Pisas (MFK).
Esaki tabata motibu pa Larmonie-Cecilia a sali mesora for di e reunion di Konseho di Minister ku tabata andando i alabes indikando ku PNP lo no por sigui partisipá den gobièrnu bou di e kondishonnan aki. E lider polítiko di PNP a yama un reunion urgente na Kas di Pueblo riba Winston Churchillweg ku ministernan, miembronan di parlamento, direktiva i sobrá prominentenan di partido.
Den e reunion aki e desishon definitivo a kai ku e ministernan di PNP lo bai entregá nan retiro na gobernadó a base di e último desaroyonan aki den seno di koalishon. Gobernadó George-Wout a aseptá retiro di ministernan di PNP, esta Larmonie-Cecilia, Ornelio ‘Kid’ Martina i Ruisandro Cijntje.
Tambe el a hiba deliberashon ku promé minister Gilmar ‘Pik’ Pisas ku a informá ku e tin sosten di partido KEM i miembro independiente di parlamento, Zita Jesus-Leito ta sostené gabinete Pisas II. NOTA: Texto ta scirbi den Papiamento fonetico di Corsou.
Corsou no a sinti efecto di welga den hafnan na Merca
WILLEMSTAD - E wèlga na hafnan merikano no tin efekto direkto ainda riba Kòrsou pa loke ta entrega di produkto, pero mas largu e wèlga dura mas probabel e chèns ta ku Kòrsou lo konfrontá tardansa den yegada di kònteiner. Tambe e wèlga por kousa riba término mas kòrtiku kaba un oumento di preis di produkto.
Parlamento na Corsou a aproba pa telefon celular den prizon bira legal
WILLEMSTAD - Cu un kantidat di 14 voto na fabor i 0 kontra ayera nochi Parlamento di Kòrsou a bai di akuerdo ku e kambio di Lei di Prizòn. Den e votashon ta 14 parlamentario a duna nan aprobashon komo ku ta solamente nan tabata presente e momentu di votashon. E shete parlamentarionan ku no a vota pa motibu di nan ousensia tabata srs. Steven Croes i Quincy Girigorie di PAR; Sheldry Osepa, Gwendell Mercelina i Elvin Gerard di PNP; Rennox Calmes di Trabou pa Kòrsou; i dr. Eduard Braam di MFK. A trata aki di un lei ku a kuminsá ku e trayekto for di aña 2019 i ku ayera a haña su konklushon.\
Na Corsou, a duna oido na campaña pa sterilisa cacho den capital
WILLEMSTAD - Fundashon Ser’i Otrobanda ta un dje promé organisashonnan ku a duna oido kaba na e yamada di gobièrnu pa hasi nan esfuerso pa por sterelisá kachónan den e bario, tantu kachónan ku doño komo esnan kayehero. T’asina ku resientemente e organisashon a tene un enkuentro spesial ku habitantenan di e bario pa tende si tin idea òf inisiativanan pa hasi ku e proyekto ta eksitoso. Durante e enkuentro ei a papia di e posibilidat di sterelisá i kastra kachó, pero tambe pa adoptá un dje animalnan aki. Tin hopi dje kachónan aki ku ta ser bandoná den bario, ku tur e konsekuensianan dje molèster ku nan ta kousa.
Gobierno di Corsou a inverti 7 miyon pa cumpra tres truck di bombero
WILLEMSTAD - Ayera komandante di brantwer Kòrsou, e Arubiano ing. Jair G. Tromp MBA a entregá minister di hustisia Shalten Hato e dokumento pa Destaho Públiko pa tres brantspùit. E vehíkulonan lo hisa e kalidat di servisio na komunidat.
Na Corsou Larmonie-Cecilia ta bira lider di fraccion PNP y Gerard colaborado di fraccion
WILLEMSTAD - Kosnan ta kanando zetá den Partido Nashonal di Pueblo. Asina presidente Efrèn Candelaria ta deklará despues di reunion di partido di djaluna 23 sèptèmber. E desishon ta bira ku lider polítiko Larmonie-Cecilia ta drenta Parlamento i lo bira lider di frakshon kaminda e por vosiferá e posishon di PNP den Parlamento i tambe na pueblo di Kòrsou.
Prome minister Pisas di Corsou tabatin audencia cu Papa Francisco na Vaticano
WILLEMSTAD/ CUIDAD VATICANO - Promé Minister Sr. Gilmar Pisas tabata di bishita na Vatikano i a keda risibí den oudiensia ku Papa Fransisko dia 18 di sèptember 2024. Durante di tur e enkuentronan aki Promé Minister sr . Pisas a keda kompaña pa Mgr. Luis Secco Obispu di Willemstad i Pastor Curtis Meris.
Follow NoticiaCla
