Informacion di gobierno mas accesibel pa residentenan riba tur isla di Reino Hulandes

ORANJESTAD - For di juni tin un Lob generator (Landsverordening Openbaarheid van Bestuur) pa Aruba, Curaçao y Sint Maarten y un Wob (Wet Openbaarheid van Bestuur) generator BES pa Boneiro, Saba y Sint Eustatius. Esaki ta haci’e mas facil pa habitantenan di e parti Caribense di Reino pidi informacion publico cu hopi biaha ta dificil pa pone disponibel, segun e periodista Luis Anibal Villegas.

Villegas awor ta studiando ley na Hulanda y tabata periodista na Aruba. E ta bisa cu e ta sigui desaroyonan riba e islanan Caribense for di Hulanda y ta mira cu data hopi biaha ta falta di instancianan gubernamental of cu preguntanan di periodistanan ta keda sin contesta.

Asina el a bin cu e idea di desaroya un generator di lob pa e islanan den Caribe, mescos cu e  Woo generator W cu ta wordo usa na Hulanda pa hasi informashon pidi di gobièrnu,  accesibel.

Inicialmente Villegas kier a traduci e generator di Lob na Papiamento, pero pronto a agrega Ingles pa asina por uza e generator riba tur isla Caribense den Reino.

Hunto cu Liset Hamming y  Tim Staal di SPOON, e centro di experticio pa investigadonan di Woo, Villegas a traha riba e proyecto pa desaroya e generator Lob pa e paisnan CAS y e generator Wob BES pa e islanan BES. Articulo ta cortesia di Caribisch Netwerk.