Jacobs: AZV tin atencion pa reto pa e.o mantene professionalnan medico na Aruba

ORANJESTAD “AZV como financiado principal di cuido na Aruba ta comprende e preocupacionnan cu tin den nos cuido pa loke ta profesionalnan, tanto pa mantene esnan cu tey y pa recluta for di pafor di Aruba”. Asina e director di AZV, Edwin Jacobs a declara diamars na Noticiacla como reaccion riba e raportahe di un dia anterior riba e tema. Tabata director di hospital Horacio Oduber drs Jacco Vroegop cu a ‘bati alarma’ riba e tema. Segun Jacobs, como sector, nan a expresa e preocupacion tambe den e asina yama Zorgakkoord, cu a keda acorda entre Ministerio di Salud, Sector Cuido y AZV na juli aña pasa.

DEFINI AREA DI ATENCION 

Segun Jacobs, den e zorgakkoord hunto nan a defini e areanan cu nan ta bay duna atencion pa asina haci nos cuido sostenibel. “ A palabra cu nos ta bay traha a base di cuadro financiero multi anual pa asina garantisa un crecemento controla di e gastonan di cuido. Esaki AZV y Ministerio a percura p'e pa reemplasa tambe e recorte di 60 miyon florin den cuido” e director a continua bisando. “Pues a  cambia e acercamento di un cortamento di gasto pa un crecemento controla di gastonan den cuadronan defini”.

PROME LIÑA DI CUIDO

E di dos punto importante di e zorgakkoord ta fortificacion di e prome linea di cuido.Segun Jacobs, den e cuadro financiero di 2024-2026 a crea espacio pa amplia cantidad di dokternan di cas, amplia cantidad si poh-nan y introduci poh pa salud mental. “Esaki ta canando. Pa fin di e aña aki nos ta yegando 50 dokter di cas” e director a sigui bisa.

SOSTENIBILIDAD DI PERSONAL

E otro punto di atencion di e acuerdo ta sostenibilidad di personal. “E punto aki ta den preparacion na AZV y e cuadro financiero 2024-2026 tin espacio pa esaki. Un parti ta e atencion pa profesionalnan actual y otro parti ta profesionalnan pa futuro”. Pa e ultimo aki AZV ta financia desde e aña aki via hospital specialisacion di 3 yiu di tera den e areanan di KNO y neurologia, un inversion di 3,4 miyon florin. “Pa e profesionalnan actual, e negociacionnan ta andando caminda e meta ta mantene nan aki. Dentro di poco lo inicia combersacionnan tambe cu hospital, Imsan y Respaldo cu ta instancianan cu ta ricibi lumpsum” e director a sigui bisa.

RECLUTAMENTO PAFOR DI ARUBA

“Pa loke ta reclutamento pafor di Aruba”,- Jacobs a continua -, “nos ta stimula pa cambia e enfoke di Europa pa Latino America”. Europa conoce pa motibo di e impacto di enbehecimento un scarsedad di profesionalnan di cuido. Scarsedad ta impulsa salarionan. Y den un mundo asina pa Aruba ta bira dificil pa competi mirando nos medionan di specialisacion. Segun Jacobs, pa Aruba ta vital pa reorienta. “Y mirando cu enbehecimento den 5 pa 10 aña tambe ta bay tin su impacto den Latino America, Aruba mester percura pa recluta prome cu esaki. Pues for di AZV por bisa cu e asunto di personal ta parti di Zorgakkoord y por lo tanto tin atencion di AZV pa crea e espacio financiero pa dedica na esaki”, Jacobs a bisa finalmente.