Isenia: Na Corsou, tarifa di coriente lo baha door di molinanan di biento na Koraal Tabak

WILLEMSTAD - Djadumingu tabatin e último transporte di e mulina pa Koraal Tabak. Atrobe tabatin un kantidat di hende kantu di kaya pa mira e último chapaletanan keda transportá den kaya pa Koraal Tabak. Mirando ku ta e último transporte grandi, e direktor di Aqualectra, sra. Neysa Isenia tambe tabata presente pa opservá esaki. Den deklarashon pa EXTRA, sra. Neysa Isenia a trese dilanti ku e ta hopi satisfecho i orguyoso di mira kon huntu por a traha pa pone e proyekto aki kristalisá. Tambe e ta kontentu kon pueblo a biba ku e transporte, i kuerpo polisial di forma profeshonal a guia e transporte. I e ta orguyoso di e Tim di Aqualectra ku semper a kere ta direkshon di “Bèrdè” tin di bai.

El a splika ku na 2022 a firma e kontrato pa e mulina di bientu i mester tuma e produkshon. E produkshon ta tuma lugá den diferente pais. E ora ei mester bai wak tur adaptashon ku mester sosodé den ret di koriente. Pasombra mas energia renovabel den bo ret, bo ret mester por akapará esaki. Promé ku e mulinanan a yega, mester a rekoré e ruta pa mira e adaptashonnan ku mester a hasi. Sra. Isenia a sigui bisa di a sinti ora a bisé ku mester pone rotònde na Sta. Rosa plat, el a pensa ta kon esaki ta bai hasi. Pero huntu ku ministerio VVRP a duna un man.

E mulina di bientu so tin un invershon di 150 mion florin. Esaki sin konta e baterianan ku mester bini. Awor ku a bai hinka 50% di penetrashon di energia renovabel den meks di produkshon mester pone bateria, si no por garantisá stabilidat di e ret. E baterianan ta 25 mion dòler. Tambe tin otro invershon ku tin di pasa den e ret. Huntu ku e proyekto aki lo sòru hasi tur kos pa e invershon.

Segun sra. Isenia ta trata di 5 mulina ku lo tin efekto grandi pa Kòrsou. Pasombra preis di koriente lo bai baha pronto. Esaki ta na momentu ku e mulinanan tur ta trahando i na mart 2025 e baterianan yega. E tarifa ta bai baha. E penetrashon di energia renovabel na Kòrsou ku atkisishon dje mulinanan aki, lo bai ta mas ku mundialmente tin. Kòrsou ta bai kana dilanti den Reino i mundu di penetrashon di energia renovabel. Kòrsou ta bai tuma delantera riba energia bèrdè, i mester ta hopi kontentu ku esaki, i orguyoso, segun e direktor a splika. E baterianan ta den produkshon, pagonan ta ser hasi. E baterianan mester tei, pasombra bientu ta volatil, e ta subi i baha, ku bateria ta sòru pa tin stabilidat ku mester pa mantené konfiabilidat di koriente na Kòrsou. E mulinanan ta inteligente i por reposishona nan mes ora ku tin bientu fuerte òf orkan. Tambe nan tin algun djente pa redusí nan zonido.

Ta bai inová kompletamente kon Aqualectra ta produsí i distribuí koriente i awa. Ta bai bin ku energia solar. Ora tin tur e meks di komponentenan den produkshon, ta pone ku e manera ku ta produsí i distribuí koriente ta kambia. Ta pasa e sistema riba Inteligensia Artifisial i hopi mas outomatisá. Ta kosnan ku segun Isenia ta avansenan enorme pa Aqualectra i Kòrsou. Den kuminsamentu di luna di sèptèmber próksimo, lo haña e promé kilowatt/uren kaba debí ku e promé mulina tei kuminsá funshoná. Pa fin di aña tur sinku mulina ta funshoná, sra. Isenia a terminá bisando EXTRA. NOTA: Texto ta scirbi den Papiamento di Corsou.