LaSorte(AHATA): E situacion na aeropuerto awe ta obviamente hopi dificil pa Aruba

ORANJESTAD - "E situacion na aeropuerto awe ta obviamente hopi dificil pa Aruba” e CEO di Aruba Hotel & Tourism Association AHATA, Tisa LaSorte a bisa Noticiacla diabierna. E ta e prome reaccion riba e situacion cu a surgi diabierna mainta na aeropuerto Reina Beatrix ora cu mester a cera e aeropuerto debi na problema cu airco. 

EXPERIENCIA PA BIAHERO

Segun LaSorte, e ta un experiencia penoso pa biaheronan y por afecta e imagen positivo di nos isla. “Pero, hopi instancia a traha hunto cu aeropuerto di un forma masha bunita pa yuda cuida e pasaheronan cu a keda pega”. 

PROTESTA DI TAXISTA

Mesora LaSorte a trece aden e situacion cu a surgi algun dia prome, ora cu un grupo di taxista rabia a blokia e caminda pa aeropuerto como protesta pa desicionan politico di gobierno, causando stagnacion pa turistanan cu mester a yega y bandona aeropuerto. “ Nos ta spera cu e grupo di taxista cu ta protestando lo no usa mayan pa hasi e situacion pior pa Aruba. Nos tur na Aruba ta biba di nos industria di turismo. Ban tur coopera pa yuda alivia e experiencia negativo di awe y demostra e cordialidad di nos hendenan." LaSorte a finalisa bisando.