Atvertencia pa posibel tormenta tropical rumbo pa St. Maarten

PHILIPSBURG - Hefe di kuerpo di bombero i alabes kordinadó di e ofisina di kalamidat, Clive Richardson ta hasi un yamada riba siudadanonan di St. Maarten pa nan keda alerta i sigui notisia di servisio meteorológiko relashoná ku un sistema di tempu ku ta na kaminda pa Karibe. Ta pronostiká ku e sistema aki lo desaroyá i bira un tormento ku lo karga e nòmber Debby.

Segun e pronóstikonan di servisio meteorológiko di St. Maarten kondishonnan ta faborabel pa e sistema aki desaroyá su mes. National Hurricane Center tambe ta sigui e sistema ku ainda ta riba oséano Atlántiko i ta dun’é 50 porshento chèns pa desaroyá i bira mas intensivo.

Un atvertensia ta bai prinsipalmente pa yobida fuerte ku e sistema aki por trese kuné. Pa e motibu aki e ofisina di kalamidat ta hasi un apelashon riba tur siudadano pa chèk si nan a tuma tur medida di prekoushon manera prepará nan pakete di emergensia ku tur hende mester tin na òrdu for di momento ku temporada di orkan a kuminsá.

Den e pakete aki mester tin entre otro kuminda (di bleki) i awa (den bòter) pa dura por lo mínimo 7 dia. Ta hasi un apelashon riba tur hende ku no a prepará nan pakete ainda pa no warda te na último momento pa hasi esaki.

Tambe ta urgi tur hende pa lesa i pone nan mes na haltura di tur e kódigo di atvertensia ku tin. Mester sa por ehèmpel e diferensia entre un “watch” i un “warning” i ta konsiente ku un tormenta no mester yega forsa di orkan pa e por tin konsekuensia fatal.

Un “tropical storm watch” ta nifiká ku por spera kondishonnan di un tormenta tropikal den 48 ora i ta enserá bientunan di entre 39 pa 73 mia pa ora. Un “tropical storm warning” ta nifiká ku por spera e kondishonnan di un tormenta yega den 36 ora.

E nòmbernan di tormenta ku a sobra pa e temporada aktual di orkan ta: Debby, Ernesto, Francine, Gordon, Helene, Isaac, Joyce, Kirk, Leslie, Milton, Nadine, Oscar, Patty, Rafael, Sara, Tony, Valerie i William. NOTA: Texto ta scirbi den Papiamento fonetico di Corsou.