ORANJESTAD - E baby di Playa cu su wowonan blau manera color di lama ta gatiando ainda. E ta conta cu e sosten di su pueblo pa e por sigui crece y para riba su propio pianan. Na 2021 Fundacion CINEARUBA a incia e proyecto abmicioso di Playa Film Festival cu e obhetivo di crea un plataforma pa expone talentonan local y na e mes un momento ofrece e publico local otro tipo di peliculanan cu nan no ta custumbra di wak. Tur esaki ta pas den e meta di Fundacion CINEARUBA pa crea un cultura di cine local.
Playa ta un festival di cine chikito y kier lag’e crece cu tempo, pa e motibo aki tur aña CINEARUBA kier scucha di comunidad. Kico e publico y e creativonan a gusta of kier wak diferente den e festival. Esaki ta esencial pasobra Playa ta traha pa e publico y e creativonan. Pa duna comentario of sugerencia por bishita e pagina aki: http://tiny.cc/reaccion.
Na 2025 Playa Film Festival ta celebrando su di cinco aña y pa e edicion di 2025 lo introduci algun cambionan. Cumisando cu e proceso di incripcion, e categorianan a wordo simplifica den dos. Pelicula cortico: ficcion, documentario, pelicula di arte of animacion. Mescos ta conta pa peliculanan largo. Pa cineastanan local e aplicacion ta completamente gratis. E categorianan di premio lo wordo crea ora cu aplicacion cera. Pa 2025 Playa tin un logo nobo di cual e enfoke lo ta mas riba e nomber PLAYA. E imagen di e festival pa e siguiente edicion lo ta e lama Tres Trapi. Desde 2023 e festival a inicia cu e uzo di imagen di lamanan rond di Aruba pa duna bida na e poster y demas imagen di e festival. Na 2023 a uza Andicuri, na 2024 Eagle Beach. Di manera aki e festival ta duna honor na e paisahenan di Aruba. Fundacion CINEARUBA ta buscando voluntarionan pa forma parti di e team di Playa. Personanan interesa por manda un email na [email protected].
Inscripcion pa Playa 2025 a habri y ta exclusivamente via FilmFreeway. E ultimo dia pa inscribi ta 28 di februari 2025. Inscripcion di pelicula no ta garantisa participacion den e festival, tur pelicula tin cu pasa door di un proceso di seleccion prome. E peliculanan oficialmente selecta lo por competi pa un premio. Riba 7 di april tur aplicante lo haya sa via FilmFreeway si nan pelicula a wordo selecta pa participa den e festival. E festival pa 2025 lo ta di 2 pa 4 di mei. Na momento cu e inscripcion cera ta imposibel pa acepta un pelicula, pa e motibo ey ta recomenda pa aplica a pesar cu e pelicula no ta completo. Na momento cu publica e programa, esey kiermen cu tur cos ta cla pa inicia cu e festival y no tin ningun posibilidad pa inclui peliculanan na ultimo momento pasobra e proceso a keda finalisa. Pa inscribi pelicula y ricibi mas informacion click riba e link: http://tiny.cc/inscribi.
ORANJESTAD - E luna di februari a cuminsa cu un celebracion mas, esta di colega Claudia Arevalo-del Castillo, kende a cumpli 5 aña den servicio cu Botica di Servicio.
SAN NICOLAS – E conocido cantante Malaghy Richardson, conoci como ‘Freddy Rasta’, a bira e Socca Winner di 2025, cu su cancion 1 for Unity, cu e banda Tsunami. Pabien na Freddy Rasta. Na di dos lugar a keda Queen Shine, di tres lugar Galloway, di cuater finalista T-Money y finalmente Blacky cu Groove Masters.
SAN NICOLAS - Durante e ultimo dianan aki Stichting Musica a publica varios video y potret riba nan Facebook page, cu ta duna un bista di e preparacion grandi cu tin tras di Aruba Caiso Soca Monarch 2025. Varios artista a wordo entrevista y ta cla pa duna un tremendo presentacion pa nan fanaticada. Diasabra awor, 8 di februari 2025, un total di 30 artista lo participa den e Soca Finals 2025, acompaña pa 14 banda.
PALM BEACH – Un grupo selecta di prensa e siman aki a experencia e Sunset Grille ‘transforma’ na Hilton Aruba Caribbean Resort & Casino. E restaurant local hopi conoci, a habri su portanan recientemente atrobe despues di un periodo di renobacion extensivo. Y tabata den cuadro di esaki cu e grupo di prensa aki tabata invita. E restaurant su imagen nobo ta un combinacion di elementonan clasico cu un toke moderno. E ta ofrece un ambiente distincto, brindando momentonan inolvidabel pa nos localnan y bishitantenan.
ORANJESTAD – Recientemente gerencia di Joia Aruba by Iberostar a celebra nan apertura oficial di e rooftop bar ZIMA, situa banda di un pisina infinito espectacular cu ta parse di uni cu e horizonte di Caribe. ZIMA ta mustra di ta e lugar perfecto pa relaha, disfruta di un experencia unico di tapas y deleita den e miho bista di e isla.
MIAMI - E artista di Aruba , nomina pa Grammy, Jeon, ta bin bek cu un poderoso colaboracion cu e exito, “Ven Ven”, hunto cu Farruko, Fariana y Alex Sensation. Originalmente graba como un tema solista ‘Savaneta’ pa Jeon y produci p’e reconocido Steve Andreas, e cancion rapidamente a capta e atencion di e figuranan grandi di musica global, acumulando miyones di views y downloads.