Ocho top atleta di Corsou ta participando den e Weganan Olimpico na Paris

PARIS - Ocho top atleta di Corsou ta participando den e Weganan Olimpico na Paris. Mester bisa mesora si cu dos ta participa representando Aruba y 6 representando Hulanda. Esaki pasobra desde 2010, Corsou a haya problema cu registracion como pais pa participa su so na Weganan Olimpico. E candidatonan cu ta participa pa Aruba ta Phillip Elhage y Just van Aanholt. E ruman Odile ta participa pa Hulanda. E otro atletanan ta Liemarvin Bonevacia, Churandy Martinal, Taymir Burnet ,Denzel Comentia, y Jean-Julien Rojer.

PROBLEMA DI CORSOU

Manera indica caba, e problema ta data for di tempo cu Curaçao a bira un pais autonomo dentro di Reino (10-10-10) y e isla tambe tabata kier su propio asociacion y miembrecia Olimpico.

E desmantelacion di Antia Hulandes y e creashon di e paisnan autonomo di Curaçao y Sint Maarten a mata top deporte riba e islanan ei. Como resultado, atletanan no por participa mas den torneonan internacional.  

Segun Nicole Hoevertsz, kende ta den directiva principal di tanto e Weganan Olimpico como e Weganan Panamericano, ta bisa cu tin un lucha duro pa permiti e atletanan di Curaçao competi na nivel halto atrobe. Sinembargo te ainda no ta posibel pa Curaçao bira un miembro completo na e nivel olimpico mas halto cu ta principalmente un tema politico y financiero. Tin 206 komishon olímpiko i “e bolo no ta birando mas grandi pa dividí,” Hoevertsz ta bisa.

BOU DI BANDERA DI ARUBA

Hoevertsz, kende tambe ta secretario general di Comite Olimpico di Aruba, a haci entretanto e oferta cu e tres atletanan di Curaçao por participa na e Weganan Panamericano bao di bandera di Aruba.

Direktor Jean Francisca di Federashon Deportivo Olimpiko Korsou (FDOK) ta konfirmá ku e oferta ei a wòrdu hasí algun siman pasá i ta bisa ku awor enbèrdat e ta e úniko opshon. Pa awor e ta un solucion interino, e ta bisa, ‘un prome stap den e bon direccion’. Pasobra e ta spera ku otro aña ‘Kurasonanonan lo por partisipá na tur torneo grandi bou di nan propio bandera’.