Premier Wever: Respeta decision di Hoge Raad riba matrimonio di mesun sexo na Aruba

ORANJESTAD – Premier Wever Croes dialuna a pidi pa tur hende respeta e decision di Hoge Raad pa permiti matrimonio di mesun sexo na Aruba. Mester bisa cu un dia despues, un parlamentario independiente a pidi juist lo contrario, esta pa bringa e decision aki. 

NO TA PERMITI DISCRIMINACION DEN CONSTITUCION DI ARUBA

Prome Minister a elabora riba e decision di Corte Supremo diabierna dia 12 di juli, den casacion den e caso di Fundacion Orguyo y un pareha local. Esaki ta un caso di casacion despues cu Corte di Husticia ya na december 2022 a tuma un decision na unda cu Corte a indica cu den Articulo 1 di Constitucion di pais Aruba, siendo e ley di mas halto, ta inclui cu no ta permiti discriminacion. Na e momento cu no permiti parehanan di mesun sexo casa, segun Corte di Husticia, esey ta un discriminacion no aceptabel pasobra e ta viola bo propio Constitucion. Na december 2022, ademas cu Corte a indica cu ta un dicriminacion, tambe a bisa cu no mester ningun ley pa legalisa e matrimonio di mesun sexo, y automaticamente na Censo nan tin cu sigui e instruccion di Corte di Husticia. 

PETICION DI 18 MIL FIRMA PA BAY CASSATIE

Prome Minister ta sigui bisa cu ora cu Gobierno a haya e decision di Corte di Husticia na december 2022, Gobierno a evalu’e y tambe a busca consehonan di un cassatie-advocaat. Tambe Gobierno e tempo ey a ricibi un peticion cu firma di alrededor di 18mil persona na Aruba pidiendo Gobierno pa bay cassatie. Gobierno a evalua e consehonan di e cassatie advocaat y e peticion di e 18mil persona cu a entrega e firmanan y a tuma e decision pa bay cassatie. 

DECISION CORTE SUPREMO 12 JULI 2024

Diabierna ultimo, dia 12 di juli, Corte Supremo (Hoge Raad) a tuma su decision y a confirma locual Corte di Husticia a bisa na december 2022, cu e echo di no permiti parehanan di e mesun sexo casa na Aruba, ta un discriminacion y violacion di e Constitucion di pais Aruba. Basa riba esaki ta ripiti e instruccion na Censo pa bay over y permiti e matrimonio entre personanan di e mesun sexo na e mesun forma cu ta permiti e matrimonio entre personanan di sexo opuesto.

DECISION FINAL

E mandatario ta indica cu esaki ta trece un decision final den e discusion. Riba casacion no tin nada otro. Prome Minister a remarca tambe cu tampoco por bin un referendum riba e tema aki pasobra Hoge Raad den su decision simplemente a duna interpretacion na e Constitucion di Aruba. Un referendum no por bay riba un constitucion. Un referendum por mustra cu por cambia un constitucion den futuro pero esey ta un procedura diferente pa cana y ta riba su mes.

“Desde awo parehanan di e mesun sexo por casa na Aruba y Censo ta prepara caba pa ehecuta e veredicto aki di Hoge Raad. Mirando cu e decision aki aworaki ta esun final, mi deseo grandi pa e pueblo di Aruba ta pa nos por uni un biaha mas, laga nos diferencianan un banda y sigui traha riba e bienestar di nos pais. E tema aki e tema aki tin comunidad dividi, no desde awo sino di hopi tempo caba y no ta na Aruba so. Sinembargo awor cu nos tin un decision final, y cu nos mester respeta e decision, laga nos uni manera e comunidad cu nos ta, convivi cu otro manera ruman, inclui otro den nos oracion y sigui ta agradecido pa tur e bendicionnan cu nos tin den nos bida y na Aruba pa asina nos ta mas fuerte pa enfrenta retonan”, Prome Minister a enfatisa.