Jurickson Profar di Corsou ta di nuebe bate awe pa Liga Nashonal den Wega All Star

ARLINGTON - Awe nochi lo tin e di 94 edishon di MLB All-Star Game na Texas. Jurickson Profar lo representá Kòrsou e aña aki den e wega aki. Esaki ta e promé biaha den su karera ku Jurickson lo ta den un All-Star Game. E yu di Kòrsou a logra esaki despues di un tremendo promé parti di temporada pa San Diego Padres. El a sera e promé parti di temporada ku e di kuater mihó promedio (.305) den Liga Nashonal. Huntu ku esaki e ta lider di Padres den hit konektá, kareda anotá, honron, kareda empuhá i promedio.

Profar a keda selektá pa fanátikonan pa ta titular den All-Star Game pa Liga Nashonal. E yu di Kòrsou lo ta di nuebe bate hungando i den leftfield awe nochi pa Liga Nashonal.

Profar a marka historia tambe mirando ku ta promé biaha, ku un pelotero di Kòrsou ta keda selektá pa ta titular den un All-Star Game.

Awe nochi e All-Star Game ta pone pa inisiá 8’or di anochi na Globe Life Field. NOTA: Texto ta scirbi den Papiamento fonetico di Corsou.