Na Corsou, team multidisciplinario a bolbe constata hortamento di coriente na negoshi

WILLEMSTAD - E Tim Multidisiplinario ku ta hasiendo kontròl di establesimentunan den oranan di anochi, ta bolbe konstatá ku negoshinan ta hòrta koriente i awa for di Aqualectra. Ta e tipo di negoshi nan ku ta hasi tipo di fechorianan aki, ta pone ku tarifa di koriente por oumentá, i konsekuentemente perhudiká un pueblo. No mas ku siman pasá den reunion públiko den parlamento minister Ruisandro Cijntje a elaborá riba e punto aki. E Tim Multidisiplinario a hasi kontròl riba djabièrnè 21 yüni den oranan di anochi.

E Tim Multidisiplinario ta konsistí di Kuerpo Polisial Kòrsou /Wijkteam Otrabanda, Inspekshon Ekonómiko di MEO, Douane, Brandweer i Aqualectra, kendenan ta realisá kontròl riba “Openbare Orde, Vergunninglandsverordening”, Akseins (Art.110), Seguridat i posibel iregularidat ku koriente.

A kontrolá 4 lokalidat, entre otro un lugá di laba outo na Nst Hoffi Bill, i dos otro negoshi riba F.D. Rooseveltweg. Aki tur kos tabata na òrdu. Sinembargo na un “standplaats” na Souax 6-16B, e tim a para operashon pa motibu di hòrtamentu di koriente. Aqualectra a deskonektá tantu

awa i koriente. Na e dos negoshinan kaminda tur kos tabata bon riba F.D. Rooseveltweg, tòg a konstatá un lokalidat tabatin hòrtamentu di koriente pegá ku e establesimentu. Aqualectra a deskonektá koriente mesora. Ta trata di un negoshi di “print” ku tabata hòrta koriente.

Dia 4 di mei durante di kontròl dje tim aki tambe a topa negoshi ta hòrta koriente. Si lugá nan komersial ta hòrta sea koriente òf awa di Aqualectra ta totalmente fuera di proporshon.

Di parti di Aqualectra nos di EXTRA a komprondé ku e maneho ta ku si nan topa iregularidat, ta kita awa òf koriente (dependé riba kua a haña iregularidat) mesora te ora e but wòrdu pagá. Aqualectra no ta duna areglo di pago riba but tampoko. Tur esaki paso Aqualectra a duna un periodo di grasia, kaminda tur hende por a remediá e situashon sin niun reperkushon. NOTA: Texto scirbi den Papiamento fonetico di Corsou.