Aruba ta cay cu un puesto y Corsou ta subi cuater puesto riba “ranking” di FIFA

WILLEMSTAD - Ayera un biaha mas a aktualisá e “ranking” di FIFA pa loke ta trata selekshonnan maskulino. E biaha aki selekshon di Kòrsou a subi vários posishon riba e  “ranking” di FIFA.

Selekshon di Kòrsou awor ta na di 87 lugá riba e “ranking” di FIFA. Esaki ta nifiká ku nan a subi ku kuater puesto, despues ku den luna di aprel nan tabata na di 91 lugá. Esaki ta e mihó posishon ku selekshon di Kòrsou tabata for di desèmber 2022. Miéntras ku esaki ta e subida mas grandi ku nan a eksperensiá for di 2020. E aña ei nan a subi di 81 lugá pa 76 lugá entre oktober i novèmber di e aña ei.

Esaki ta un di e promé biahanan ku selekshon di Kòrsou ta subi riba e “ranking” di FIFA, despues ku for di novèmber di aña pasá. Nan a keda entre puesto 90 i 91 riba e “ranking”. Te ainda e puesto di mas haltu den historia pa Kòrsou riba e “ranking” di FIFA, tabata 68 lugá na yüli 2017.

17 di yüli lo aktualisá e “ranking” di FIFA despues di tantu Kampionato Oropeo i Copa America ku ta finalisá 14 di yüli.

Pa loke ta trata selekshon hulandes nan ta keda na di 7 lugá riba e “ranking”, isla ruman Aruba a kai ku un puesto i ta awor na di 194 lugá i Sürnam a subi ku tres puesto i ta na di 141 lugá.

Argentina, Fransia i Bèlgika ta keda den e topá 3, Brasil ta subi ku un puesto bai di kuater puesto miéntras Inglatera ta kai ku un puesto i ta awor na di sinku puesto.

Selekshon di Kòrsou den luna di sèptèmber lo ta bèk den akshon ku weganan bálido pa CONCACAF Nations League. NOTA: Texto scirbi den Papiamento fonetico di Corsou.