Parlamento ta vota diaranson pa ley di matrimonio mesun sexo y no diamars mas

ORANJESTAD – E reunion pa trata e concepto di ley di matrimonio mesun sexo ta pasa pa diaranson awor, enbez di mayan diamars. Pues mester warda un dia mas. Den un reaccion chikito di presidente di Parlamento Edgard Vrolijk dialuna na Noticiacla.com, e la splica cu debi cu un parlamentario no por ta presente, a opta pa hala e fecha un dia. 

KICO TA PASA

A splica cu awor a ‘agendeer’ e reunion pa diaranson 2’or di atardi, unda cu e intencion ta pa bin hunto, y solamente pasa pa votamento mesora. “No ta trata e ley di nobo. Ta djis habri e reunion y ta bai na votacion di biaha y keda cla” Vrolijk a sigui splica. Pues e lo ta algo di un rato, y rapidamente lo sa kico e resultado di e votacion ta. Ultimo biaha cu a haci e voto, esaki a keda empata 10-10, y uno a abstene di vota. 

EMPATE ATROBE?

Si e ley keda empata un biaha mas, e ley ta keda rechasa y ta pasa pa pasado. Posiblemente den futuro por traha un otro concepto, y purba un biaha mas. Pero e concepto actual, riba cual a debati caba, ta keda rechasa formalmente y ta pasa pa historia. 

PARLAMENTARIO

Noticiacla a compronde cu e parlamentario cu no por tabata presente ta Vallejo, pa motibonan medico personal. E lo ta den exterior y ta bolbe bek mayan, esta dia 18 di juni. Pa e por ta presente, a pospone e reunion e ora cu un dia.

CASACCION

Mientrastanto, mester corda cu otro luna, dia 12 di juli pa ta exacto, Corte di Casacion ta presenta nan veredicto riba e sentencia di dos aña pasa December, unda cu huez na prome instancia a dicta cu mester habri matrimonio di pareha di mesun sexo pa Aruba (y Corsou) tambe. Gobierno di tanto Corsou como Aruba a bay den casacion y e sentencia di esaki ta otro luna. E realidad ta cu e sentencia ey, ta surpasa tur otro ley cu mientrastanto ta vigente of a keda aproba. P.e. si diaranson aworaki, Parlamento dicidi contra di e ley aki, y corte di casacion dicta otro, esun di corte di casacion ta reemplaza e ley aproba den Parlamento. Si e ley di diaranson awor keda aproba, pero e ta diferente na esun cu corte di casacion (contenido), e ora mester adapta e ley ey. Y pa esun di casacion no tin mas caminda pa cana. Manera prome minister Wever Croes a confirma pa Noticiacla, e decision di casacion ta final y cu esey tur cos a caba tambe.