Studiantenan di Caribe a comparti preocupacionan na Parlamentarionan na IPKO

DEN HAAG – Durante e reunion Interparlamentario di Reino IPKO, un total di 20 studiante di Curaçao, Aruba, Sint-Maarten, Bonaire y Saba a papia cu parlamentarionan di Caribe di Reino Hulandes.    

Nan a comparti nan experencia y a enfatisa e necesidad pa mas atencion pa nan situacion na Hulanda. Entre nan, e studiantenan, cu ta varia di MBO pa WO, a informa cu e preparacion pa studia na Hulanda ta carece, sigur pa loke ta e shock cultural y sosten financiero.  Tambe nan a papia di e retonan ora cu ta trata di e gasto halto di costo di bida y e necesidad pa tin un ambiente estudiantil internacional. E parlamentarionan a aprecia e storianan y a reconoce e importancia pa trece yiunan di tera bon studia bek pa e islanan. E reunion di IPKO ta termina awe.