Bruins: Gobierno Hulandes nobo mester sigui atende cu deficit democratico den Reino

DEN HAAG - Ta na e gobièrnu nobo di Hulanda ku ta den formashon ainda pa sigui atendé ku disputanan den Reino manera e défisit demokrátiko. Asina minister hulandes demishonario enkargá ku Asuntunan di Eksterior, Hanke Bruins Slot ta bisa.

Ta na e gobièrnu nobo pa organisá un Konferensia di Reino pa deliberá riba e problemátika di défisit demokrátiko. E tópiko aki a bin dilanti durante tratamentu di e tratado fiskal ku Kòrsou a firma ku Malta i ku segun reglanan konstitushonal Tweede i Eerste Kamer di Hulanda mester ratifiká pa e haña forsa di lei.

Segun e minister negoshá tratadonan fiskal ta un outoridat outónomo di e paisnan den Karibe i pa e motibu aki Hulanda su ròl semper ta unu pa keda den fondo i pa asistí e paisnan ku konosementu. Tambe t’asina ku unabes ku e tratadonan ta firmá ta presentá esakinan na parlamento hulandes pa nan pasa silensioso.

Algun frakshon den Tweede Kamer sinembargo a bisa di tin pregunta riba e tratado i konsekuentemente a invitá delegadonan spesial di parlamento di Kòrsou pa nan tambe ta presente na e tratamentu. Ta durante di e debate aki ku preguntanan riba outonomia di e paisnan den Karibe i e défisit demokrátiko den Reino a bolbe bin dilanti.

Bruins Slot a bisa ku parti di akuerdo di gabinete Rutte IV tabata pa atendé ku e punto aki i sekretario di estado pa Relashonnan den Reino for di 2 aña pasá a kuminsá atendé aktivamente ku e asuntu di défisit demokrátiko. Segun e minister den e konsulta atministrativo na 2023 ku e paisnan den Karibe a sekretario di estado a diskutí riba e défisit demokrátiko aki a base di un moshon di eks parlamentario pa SP, Ronald van Raak.

Den su moshon Van Raak a boga pa yega na un desishon mas aleu di kon pa eliminá e défisit demokrátiko den Reino teniendo kuenta ku resiprosidat. E intenshon tabata pa durante di e Konferensia di Reino ku mester a tuma lugá na komienso di 2024 sigui deliberá riba esaki, esta Bruins Slot.

“Pero despues ku gabinete Rutte a kai na yüli 2023 organisashon di e Konferensia di Reino a para ketu.” Segun Bruins Slot ta na e gobièrnu nobo awor pa kontinuá ku e trayekto aki. NOTA: E texto ta scirbi den Papiamento fonetico di Corsou.