Corte di apelacion a scucha testigo Dammers (DIP) den caso Avestruz awemainta

ORANJESTAD – Corte di Apelacion dialuna mainta a scucha e prome testigo   den e caso Avestruz, esta sra I Dammers, miembro di management team di Directie Infrastructuur en Planning (DIP). Den e caso aki, a pone sra Dammers sinta riba un stul, dilanti huez cu un microfoon pa e por a duna su comentario. Conforme e proceso, abogado David Kock cu a solicita pa scucha e testigo aki na nomber di su cliente Benny Sevinger, a cuminsa cu e interogatorio, sigui pa un di e hueznan y despues Ministerio Publico. Pa esaki a huramenta Dammers y mustre riba su derechonan y obligacion. 

SCUCHA TESTIGO ISABEL DAMMERS

E huez a cuminsa na establece e relacion entre Dammers y e sospechoso Sevinger, sea si e tabata uno personal, y of trabou, pa cual Dammers a desmenti ambos caso. A puntra si e ta famia, si tin relacion familiar y of di trabou y ambos biaha Dammers a desmenti. Abogado Kock (kocklegal) a haci un total di 16 pregunta na Dammers, sea combinando cierto pregunta, basa riba e progreso di e contestanan di Dammers. 

PRESTINE ESTATES

A nota cu e intencion di e abogado Kock tabata pa sa kico Dammers su envolvimento tabata den e proceso di expansion di Holiday Inn hotel, via e compania conoci como Presine Estates, e compania di e hotelero Alfred Lowenstein. Esaki pasobra parti di e caso ta trata e proyecto aki, unda cu e minister en cuestion lo mester a haya regalo y fabor a cambio di a otorga e permiso pa e proyecto aki, esta e expansion di e hotel cu mas camber. 

DAMMERS TABATA ENVOLVI?

For di e serie di pregunta, a saca afo di e contestanan di Dammers, cu e tabatin conocemento di e proyecto, aunke cu ta trata basta tempo pasa (2015). E ta sigura cu tabatin documentacion pa cu cambio di e destinacion di e erfpacht. A purba wak si Dammers por a confirma of desmenti con e participacion di DIP tabata den e caso aki, y mas aun, kico e rol di e minister en cuestion e tempo ey, Sevinger, tabata den esaki. Entre nan, a puntra riba e documentacion y peticion pa cu e proyecto y, na ken esaki tabata dirigi. Algo cu Dammers a bisa di ‘no ta corda’. A purba constata si e peticion pa e proyecto tabata algo ‘inusual’, pero esaki no tabata e caso segun Dammers, pasobra segun e mes a bisa, cambio di destinacion di un tereno no ta algo ‘inusual’. A puntra sra Dammers si minister di Turismo e tempo ey tambe tabata envolvi den e proyecto, riba cual Dammers a bisa di no por a corda. E ta corda si, cu tabatin un documentacion di confirmacion cu e la pasa notario. Pero e no por a corda kico e resultado final di gobierno tabata riba e asunto. 

ABATH

Loke a hala atencion ta cu segun Dammers, su colega F. Abath, miembro di e management team, tabata mas envolvi cu e parti aki, ya cu tabata trata di algo comercial y cu esaki tabata su (esta Abath:red) experticio. Ta bon pa recorda cu den e caso inicial Abath tambe tabata un di e sospechosonan, pero awor no ta parti di e grupo.   Dammers a splica cu e no tabata esun cu a traha riba dje pa loke ta e contenido. Abogado Kock a keda insisti pa sa e envolvimento exacto di Dammers den esaki, y si e tabatin contacto tambe cu abogadonan. Dammers a ripiti cu tabata hopi tempo pasa y cu e tabatin contacto cu su colega riba e ubicacion di e tereno, pero no tabata corda e detayesnan, splicando atrobe cu ta su colega Abath tabata esun envolvi. Loke si Dammers a haci, ta cu e la conferi cu coleganan riba e tema, en general y riba e resultado. Despues e no a envolvi su mes mas. E la compronde si cu e destinacion a wordo cambia. E trabounan a wordo haci door di DIP manera mester ta, pero ora cu a puntra riba detayes manera ki dia e concepto a keda cla, Dammer a bisa di no tabata sa. Mes momento e la recorda si cu e informacion ey lo mester ta riba e acta notarial di e documento. E no por a confirma si e minister e tempo ey (Sevinger) tabata envolvi den esaki ni con hopi. Aki e abogado a purba establece of elimina cualkier sospecho si Sevinger tabata envolvi personalmente den e casonan aki.  Segun Dammers, loke cu e minister tabata haci si, tabata busca drechi di casonan en general, pero no di contenido specifico di casonan specifico. A splica si cu e minister ta liber pa busca drechi di casonan den DIP, cu ta cay bou di dje. Mas specifico, e abogado a purba saca afo cuanto Dammers tabata sa di e proceso specifico di e proyecto hotelero. Riba pregunta di huez despues si (DIP) tabatin contacto cu e minister riba e caso aki, Dammers a bisa cu e no tabata sa. Pero si tabatin mes, esaki lo mester tabata cu Abath. Huez tambe a puntra si Dammers tabatin contacto cu tercer partido, y cu si e mes a haci negosacion cu Prestine Properties. Algo cu Dammers a bisa di no taata corda, pero cu no ta abnormal cu partidonan ta papia cu otro, pasobra den un proceso asina tin un bay bin, sugeriendo cu por bien ta cu tabatin papiamento cu tercera partido. E la bolbe hala Abath den e proceso, splicando e ora cu ta Abath tabata lidera e proceso pa e proyecto specifico aki. Huez e ora a laga Dammers lesa un email den corte, di dje mes, y a puntra Dammers riba dje despues. Dammers a admiti di a scirbi e mail aki, unda cu e la basicamente splica cu e la haya pregunta y e la contesta. E tabatin cierto duda riba cierto punto di e proceso, pero a aclarea si tambe cu esey tabata su opinion personal. Entre nan, si e proyecto ta corecto pa wordo ehecuta manera cu e ta wordo pidi. Parti di e pregunta tabata si Dammers tabata di acuerdo cu mester a prolonga e tempo duna na e compania pa e por ehecuta e expansion. Esaki pasobra e tempo pa haci esaki lo a vence. E no por a corda si e acuerdo a wordo haci of no of a para esaki. “Mi no sa esey for di cabez” Dammers a contesta. Riba pregunta di Fiscal, si Dammers tabata sorpendi cu a aproba e permiso, Dammers a bisa cu no. “No tabatin discusion. No ta ami tabata esun pa ehecuta esaki. Y mi a asumi cu tur cos lo a bay bon ya cu su colega Abath tabatin amplio experencia cu esaki pues no tabata duda cu cos lo a termina bon. 

CONCLUSION

E conclusion cu por a nota di e mainta, ta cu tanto abogado, huez y fiscal, kier a saca afor si algo a bay robez cu e otorgamento di e permiso pa cambia destinacion di e acta pa e compania Prestine Properties, si minister tabata personalmente mete y envolvi, y si DIP a haci su trabou conforme regla y of a cana un caminda cu no tabata corecto, creando un situacion ilegal. Dammers a splica cu mientras cu e tabatin cierto conocemento di e proyecto, e no a lidera esaki, y e no por a saca afo si minister a actua malo of no, y cu DIP a actua conforme e reglanan cu e tin cu cumpli cu ne. Abogado, kier a kita tur duda via Dammers, cu su cliente lo tabata envolvi, y of a haci cosnan ilegal, pa cual e ta wordo acusa di dje.