Apelacion caso Avestruz ta inicia otro siman cu scuchamento di testigo

ORANJESTAD – Corte Superior otro siman dialuna ta inicia e caso di Avestruz, cu scuchamento di testigo. Mas informacion a bira conoci diamars di kico tur lo sosode specificamente e proximo dos simanan, cu Corte Superior tin reserva pa e caso. E caso mes lo cuminsa dialuna pa 9’or di mainta dialuna 13 di mei. Lo scucha 4 testigo entre 13 y 14 di mei (tin mas pero nan a wordo scucha caba pa Huez Comisario). Despues ta sigui dia 15, 16, y 17 cu repaso di e dossiernan y circumstancia personal di cada sospechoso.

SIMAN DOS

E di dos siman cu ta inicia dia 20 di mei, ta turno pa Ministerio Publico presenta su rekisitorio y den e dianan siguiente ta sigui e defensa di e 7 sospechosonan, cu ta inclui repliek, dupliek, pa despues bin cu e ultimo palabra. E sospechoso principal lo ta ex minister y actual parlamentario Benny Sevinger.