Hof a reduci e suma cu ex minister Croes mester paga bek di expropiacion

ORANJESTAD – Corte di apelacion a mantene e sentencia original di expropiacion di ex minister Paul Croes diahuebs como parti di e caso Ibis, cu un cambio si. Envez di paga AWG 183.489,10  bek, e ta haya un reduccion di 20 mil. Pues e mester paga e suma di AWG 163.489,10 mil florin, of sinta un castigo di prison di 18 luna extra di loke e ta sintando aworaki caba. No ta conoci si Croes lo apela, y e abogado Desiree Croes lo a comunica y delibera cu su cliente mas laat awe riba esaki. 

E SENTENCIA

Na salida, fiscal cu ta atende cu prensa, Patrick vd Biezen a splica cu e motibo cu Hof a reduci e suma, ta pasobra tabatin tardansa pa trata esaki, (a pasa 3 aña), y e ora Hof ta haya cu mester reduci e suma.  Mes momento vd Biezen a sigura cu no ta fayo di Ministerio Publico cu a tarda, sino cu e proceso di apelacionan a alarga e tempo (a apela, djey a bay casacion:red) y ta pesey a tarda mas largo cu e tempo stipula. 

BESLAG RIBA CAS

Van der Biezen a splica tambe cu no ta intencion pa Croes keda mas largo den prizon, pa cual e tempo ey a confisca e cas, cu ta nifica cu si dado caso Croes faya den paga e suma, por haci uso di e parti aki, y Ministerio Publico lo tuma e cas for di Croes, como ‘pago’ di e debe cu Croes tin ainda (apropiacion). No ta conoci si e suma di e cas di Croes, ta cubri e suma total of no. 

E SUMA

E suma ta dos cifra hunto, esta 55.000 florin y 128 mil florin, cual Ministerio Publico ta considera cu a keda estafa y laba (witwassen), den e caso y cu esaki e mester paga bek. 

ABOGADO

Abogado Desiree Croes ta desapunta cu e sentencia pasobra a purba pa exonera Croes di full e suma. Y segun Croes, Hof no a considera e loke cu nan a trece dilanti den defensa pa logra esaki manera e.o. cu Croes tabatin placa riba su cuenta inicialmente legalmente adkeri, placa di casamento, benta di cacho (puppies) , carnaval y mas). Si e ta contento cu e suma cu su cliente mester paga bek, a keda reduci na 20 mil florin cu ta algo. Loke e ta remarca ta cu e suma cu finalmente ta trata di dje, ta mucho menos cu e ‘miyones’ cu a acusa Croes inicialmente di a malversa y tabata envolvi den dje. Ademas, e ta mustra cu gobierno a inverti mucho mas placa cu e placa cu Croes tin cu paga bek, cu ta algo cu mester pensa ariba. Cu esaki e ta mustra cu gobierno a haci todo por todo pa gara Croes, y a duna e caso extremadamente hopi atencion, inverti hopi hopi placa, pa na final, logra ‘solamente’ esaki. Tambe Croes a recorda e periodo inicial cu Croes a sinta 60 dia den isolacion cu ta increibel, cu ta mas cu ta permisibel. Y asina tin  hopi mas cos. No a bisa cuanto lo a inverti den e investigacion di e caso, compara cu e placa cu aworaki Croes tin cu paga bek. Click AKI pa e veredicto.